Qazaqstan Respýblıkasy Prezıdenti janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen óńirde isker áıelder forýmy ótti. Sharaǵa Aqtaý jáne Jańaózen qalasymen, Qaraqııa, Túpqaraǵan, Munaıly, Mańǵystaý, Beıneý aýdanynan kásibin dóńgeletip otyrǵan túrli saladaǵy isker áıelder qatysty.
-Búgin mine aýyl áıelderi forýmyn 14-nshi oblysta ótkizýge kelip otyrmyz. Jalpy memleket saıasatyndaǵy mańyzdy taqyryptyń biri ol aýyldyń turaqty damýy jáne aýyl turǵyndarynyń tabysyn arttyrý bolyp tabylady. Búgingi forýmda aýyl áıelderiniń kásibin damytý úshin qandaı ádister qoldandy? Qarjy máselesi qalaı sheshildi? Mehanızmder qandaı? degen suraqtardy keńinen talqylap, tájirbıe almasty, dedi Prezıdent janyndaǵy jasyl ekonomıkaǵa ótý keńesiniń múshesi Saltanat Raqymbekova
Aýyl áıelderiniń forýmy 2008 jyly Birikken Ulttar Uıymy assambleıasynyń bastamasymen, 15-qazan halyqaralyq aýyl áıelderiniń kúni aıasynda júzege asyrylyp keledi. Aldaǵy ýaqytta isker áıelderdiń óńir ekonomıkasyna qosyp otyrǵan úlesimen, jetistikke jetken tarıhyn keń kólemdegi kitap qylyp shyǵarý josparlanýda.
-Aýyl áıelderiniń Mańǵystaý oblysyndaǵy forýmy ǵajap dúnıe dep esepteımin. Bul óńir ejelden qaımaǵy buzylmaǵan, ulttyq dástúri saqtalǵan, ózindik ustanymy bar tamasha óńir. Biz týrasyna kelsek qazir qalaǵa kóbirek kóńil bóldik. Al dalamen qalanyń arasyn jaqyndatý ol tek aýyldaǵy áıelderdi qoldaý ǵana emes, ómirdi jaqsartý úshin bolyp jatqan dúnıeler. Onyń arǵy jaǵyn alyp qaraıtyn bolsaq, ulttyq múdde, rýhanı ósý, otbasylyq qundylyqtar jatyr. Osy rette men qazaq áıelin úlken kúsh dep aıtar edim, dedi Prezıdent janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń múshesi Qarakóz Súleımenova.
Shilde aıynda bastaý alǵan forýmǵa elimizdiń ár aımaǵynan 2700 áıel azamattar qatysyp, 85- ke jýyq isker áıeldiń jetistik tarıhy aıtyldy. Búgingi kúni aýyldyń turaqty damýyna qandaı yqpal jasalyp otyr? Úkimet tarapynan qansha baǵdarlama iske asyrylýda? Kásipti qalaı, neden bastaý qajet, qaı jaǵynan kelý kerek degen máseleler osy forýmda sóz boldy.
Aıta keteıik, 7-8 qarasha kúnderi II respýblıkalyq aýyl áıelderiniń forýmy Nur-sultan qalasynda ótpek. Oǵan ár oblystan 15 delegat qatysady dep kútilýde.