Mańǵystaýǵa issaparmen kelgen Sybaılas jemqorlyqqa qarsy is-qımyl agenttiginiń ókili Arman Berdalın jáne Respýblıkalyq arnaıy monıtorıng tobynyń múshesi, etno dızaıner Yrza Tursynzada jáne aýmaqtyq Departament basshysynyń birinshi orynbasary Serik Qanybekov óńirlik kommýnıkasııalar qyzmetinde buqaralyq aqparat quraldary ókilderimen kezdesti.
Brıfıng aıasynda Arman Berdalın Sybaılas jemqorlyqqa qarsy is-qımyl agenttiginiń 2019 jyldyń 13 maýsymynda Prezıdent Jarlyǵymen qaıta qurylǵandyǵy, birneshe departamentterdiń jasaqtalǵandyǵyn jáne prevensııa baǵytynyń jumystaryna toqtalyp ótti.
Prevensııa departamentiniń atqaryp otyrǵan sharalary – sybaılas jemqorlyqqa qarsy monıtorıng júrgizý, sybaılas jemqorlyq táýekelderin taldaý. A.Berdalınniń aıtýynsha, 2019 jyldyń basynan beri Eńbek jáne halyqty áleýmettik qorǵaý mınıstrliginde, «Qazavtojol», Densaýlyq saqtaý mınıstrliginde, Dárilik saraptaý ulttyq ortalyǵynda, Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıtetinde, Memlekettik kirister komıteti jáne Ulttyq olımpıada komıtetinde taldaýlar júrgizilgen.
-Taldaýlar aıasynda buryn isti bolǵan, jaýapqa tartylǵan adamdardyń laýazymdy qyzmette otyrǵandary anyqtaldy. Bunyń barlyǵy tereń taldaýlar men jan-jaqty zertteý, zerdeleýdiń nátıjesi, dedi A.Berdalın.
Spıkerdiń málimetine súıensek, Agenttiktiń 1424 jelisine kún saıyn 10-15 shaǵym tirkeledi. Olardyń basym bóliginiń derekteri rastalyp, naqty dáleldenip, halyqtan túsken aryz-shaǵymdardyn nátıjesinde birneshe is qozǵalǵan. О́tken jyldyń ózinde kelip túsken shaǵymdar boıynsha 32 is qozǵalyp, aǵymdaǵy jyldyń 8 aıynda sotqa deıingi 41 is tirkelipti. Agenttikke jemqorlyq faktilerin habarlaǵan adamdarǵa zańnama boıynsha bir jolǵy syıqy beriledi. 2018 jyly 185 adam 23 mıllıon, 2019 jyldyń basynan 116 adam 17 mıllıon syıaqy alǵan.
Arman Berdalın syıaqynyń mólsheri jemqorlyq faktisiniń aýyrlyǵyna qaraı beriletinin atap ótti.