Aqtaý qalasynda «Biz adamdar – biz birgemiz» qoǵamdyq qorynyń bastamasymen júrgizilgen qaıyrymdylyq sharasy jalǵasýda.
Jaqsylyq jasaýdy maqsat etken sharany baı-baqýatty adamdar men júregi jumsaq jandar qoldap áketti. Turaqty mekenjaıy joq adamdarǵa qoldaý kórsetý maqsatyndaǵy is-shara talaı jannyń júregin shattyqqa, júzin qýanyshqa bóledi.
Mańǵystaý oblystyq máslıhatynyń depýtaty Abbat О́risbaev, «CRUZ Logistics» jaýapkershiligi shekteýli seriktestigi Batys Qazaqstan óńiri boıynsha dırektory Hıtesh Chandra, jas kásipkerler Áıgerim Aıtbatyrova jáne Sholpanaı Smaǵulova jalǵyzbasty zeınetkerler men turaqty mekenjaıy joq adamdarǵa kómek qolyn sozdy.
Erikti top aldymen ekinshi toptaǵy múgedek Olga Golovkovanyń úıine baryp, qajetti zattar tabystady. Búginde seksenniń seńgirine shyqqan Olga Alekseevnanyń qýanǵany sonshalyq, kóz jasyna erik berdi. Oǵan gúl shoqtary, azyq-túlik, «Zere» tigin sheberhanasynda tigilgen tósek-oryn jabdyǵynyń jıyntyǵy tabystaldy.
Sodan soń kóshe kezip, úısiz júrgen jandarǵa ystyq tamaq úlestirildi. Olardyń basym bóliginiń qaı aýmaqtarda júretinderi belgisiz, biraq kóshede kezdeskenderdiń eshqaısysy nazardan tys qalmady. Búgingi sharany uıymdastyrýshylar, ash júrgen jandarǵa qaıyrymdylyq kórsetken saýapty is dep biletinderin aıtady jáne sanaly adamdar bos ýaqyttaryn paıdaly iske jaratqany mańyzdy dep sanaıdy. «Kez kelgen saýapty is árbir azamatty, ásirese jastardy meıirimdilikke jáne ár nársege janashyrlyq tanytýǵa tárbıeleıdi» deıdi A.О́risbaev.
«Adamnyń kúni – adammen» degen osy...
Mańǵystaý oblysy