«Áleýmettik medısınalyq saqtandyrý qory» KEAQ Basqarma tóraǵasynyń Erik Baıjúnisovtyń málimdeýinshe, 2020 jyly árbir saqtandyrylǵan adamǵa kórsetiletin medısınalyq kómekke 83,1 myń teńge jumsalmaq. Nátıjesinde azamattardyń densaýlyqqa jumsaıtyn jeke shyǵyndary edáýir qysqarady.
Tıisti mekemeniń Almaty qalasy boıynsha baspasóz qyzmetiniń málimeti boıynsha, respýblıka turǵyndary medısınalyq kómekke qatysty saýaldaryn 1406 nómirine joldap, naqty jaýaptar alýyna múmkindigi bar. Tegin medısınalyq kómekke bólinetin qarajat kólemi jyl saıyn artyp otyrǵanyna qaramastan, medısına salasyndaǵy shyǵyndardyń 41 paıyzy halyqtyń qaltasynan shyǵady. Bul DDSU belgilegen mejeden eki ese kóp.
Qordyń málimetinshe, qazir halyqtyń 93 paıyzy saqtandyrý júıesimen qamtylǵan. Onyń paıyzy – memleket tarapynan saqtandyrylatyn jeńildigi bar 11 mln azamat. Qalǵany – jaldamaly jumysshylar, jeke kásipkerler men BJT tóleýshiler. Saqtandyrylǵandardyń bári de 2020 jyldan bastap keńeıtilgen kólemde medısınalyq kómek ala alady. Olardyń qatarynda salalyq mamandar keńesi, baǵasy qymbat zerthanalyq analızder men MRT, KT syndy dıagnostıkalyq zertteýler de bar.
«Turǵyndarǵa az mólsherde jarna tólep, aýyryp qalǵan jaǵdaıda quny mıllıondaǵan teńge turatyn kómekke qol jetkizýge bolatynyn aıtyp túsindirýimiz kerek. Mysaly, júrek nemese baýyr almastyrý syndy kúrdeli operasııalar qoljetimdi bolmaq. Áleýmettik saqtandyrý degenimiz mine, osy», - dedi E.Baıjúnisov.
Jurtshylyqty jumystan shyǵyp qalǵan jaǵdaıda medısınalyq kómek kórsetý tártibi ózgere me degen saýaldyń mazalaıtyny anyq. Ondaı jaǵdaıda «Jumyssyz qalǵan azamattar MÁMS paketine engen qyzmetterdi jarna tóleý toqtaǵannan keıin úsh aı boıy paıdalana alady. Basqa jumysqa turǵannan keıin jumys berýshi onyń atyna aýdarym jasaı bastaıdy. Al, «eki qolǵa bir kúrek» tappaǵan jaǵdaıda tıisti oryndarǵa habarlasyp, jumyssyz retinde resmı tirkelý qajet. Bul sanat memleket tarapynan saqtandyrylady».