Elordada 24-25 qazanda «Nazarbaev Zııatkerlik mektepteri» derbes bilim berý uıymynyń uıymdastyrýymen «Mektep álemin ózgertetin ustazdar» atty XI halyqaralyq ǵylymı-tájirıbelik konferensııasy ótip jatyr.
Konferensııa qatysýshylary qatarynda Qazaqstannyń ár óńirinen kelgen muǵalimder, ǵalymdar, bilim berý mekemeleriniń basshylary, sonymen qatar AQSh, Ulybrıtanııa, Izraıl, Norvegııa, Nıderlandy, Fransııa, Japonııa, Sıngapýr, Gonkong, Vetnam, Avstralııa, Ispanııa, Reseı, Túrkııa, Armenııa sekildi 17 memlekettiń ókilderi bar.
Shara barysynda qala ákimi Altaı Kólginov pedagog mamandyǵy - qazir álemdegi eń mańyzdy mamandyqtardyń biri ekenin atap ótti.
«Ustaz-qoǵamdaǵy basty tulǵa. Pedagog balalardy tárbıelep, bilim beredi. Balanyń tulǵa bolyp qalyptasýyna úlken septigin tıgizedi. Jahandyq álemniń eńbek naryǵynda bolyp jatqan transformasııalar árbir muǵalimdi «ómir boıy bilim berý» prınsıpin túsinýdi jáne qabyldaýdy talap etedi. Muǵalimderimiz árdaıym bir-eki qadam alda bolýy kerek», - dedi A. Kólginov.
Al «Nazarbaev Zııakerlik mektepteri» derbes bilim berý uıymynyń basqarma tóraıymy Kúlásh Shámshıdınova baıandamasynda ustazdardyń qandaı bolý kerektigine toqtaldy.
«Muǵalimniń dúnıetanymy men ózindik sezinýi basty qozǵaýshy kúshterdiń biri bolyp tabylady. Muǵalim eń aldymen ózine-ózi senýi tıis. Barlyq balalardyń oqyp, damı alatynyna, árqaısysynyń oqý nátıjeleriniń jaqsara alatynyna senýi kerek, óıtkeni onyń barlyǵy ózgermeli. «Balanyń deńgeıi osydan artpaıdy» dep bir jaqty baǵalaýǵa bolmaıdy. Muǵalim óz áreketteri arqyly oqýshyǵa ony túsinip, qoldaıtynyn kórsetýi tıis», dedi K. Shámshıdınova
Shara barysynda Kembrıdj ýnıversıtetiniń bilim berý ınnovasııalary ortalyǵynyń dırektory Kollın MakLaflın, Izraıl Beıt Berl kolledjiniń aǵa oqytýshysy Ioram Harpaz, KidZania halyqaralyq bilim berý baǵdarlamalarynyń dırektory, balalar aldyndaǵy eńbegi úshin Brıtan ımperııasy ordeniniń qurmetti ofıseri Ger Graýs, Ýtreht ýnıversıtetiniń professory Teo Výbbels (Nıderlandy), Stenford ýnıversıteti Halyqaralyq daıyndyq baǵdarlamalarynyń atqarýshy dırektory (AQSh) Rık Sommer sııaqty belgili ekspertter men ǵalymdar jáne bilim salasynyń basqa da álemdik ókilderi baıandama jasady.
Ekikúndik konferensııa barysynda úsh plenarlyq otyrys, 12 sheberlik sabaǵy, 24 seksııalyq otyrys ótedi. Sondaı-aq sala úzdikteri 12 baǵyt boıynsha júzden astam baıandama, alty semınar, avtograf-sessııalar, poster-sessııalarǵa qatysyp, bilim berý resýrstarynyń kórmesin tamashalaıdy.
Jyl saıyn halyqaralyq konferensııada tájirıbe almasatyn jáne zertteý nátıjelerin usynatyn Zııatkerlik mektepter muǵalimderiniń, pedagogıkalyq sheberlik pen pedagogıkalyq ólsheýler jáne bilim berý ortalyqtary qyzmetkerleriniń sany artyp keledi. Sharanyń ekinshi kúni halyqaralyq qazylar alqasy «Úzdik poster» jáne «Úzdik prezentasııa» nomınasııalary boıynsha jeńimpazdardy anyqtap, marapattaıdy.