Kenshiler astanasynda osymen toǵyzynshy ret ótken «Sen netken baqytty ediń, keler urpaq…» atty respýblıkalyq Qasym oqýlarynyń jeńimpazdary men júldegerleri anyqtaldy.
Baıqaýdyń sheshýshi kezeńinde «Dúnıege keler áli talaı Qasym...» jáne «Jas dáýren» atty eki atalym boıynsha 26 úmitker baq synady. Jalpy bıylǵy Qasym oqýlaryna Qaraǵandy, Shyǵys Qazaqstan, Batys Qazaqstan jáne Soltústik Qazaqstan oblystarynan barlyǵy 48 ótinim túsken bolatyn.
Quramynda aıtysker aqyn, Qazaqstan Jazýshylar odaǵynyń Nur-Sultan qalalyq fılıalynyń tóraǵasy Dáýletkereı Kápuly, aqyn-jazýshy, Qazaqstan Jazýshylar odaǵynyń Qaraǵandy oblystyq fılıalynyń tóraǵasy Serik Saǵyntaı bar qazylar alqasy aqyn qyz Saltanat Qaıyrbekti «Dúnıege keler áli talaı Qasym...» atalymy boıynsha bas júldege laıyqty dep tanydy. Sondaı-aq bul atalymda Túrkistan oblysynan kelgen Baýyrjan Erman birinshi júldeni jeńip alsa, Pavlodar oblysynan qatysqan Asylbek Marta ekinshi oryn ıegeri atandy. Al júldeli úshinshi oryndy Qaraǵandy oblysynyń ókili Bek Yqylasov qanaǵat etti.
«Jas dáýren» atalymy boıynsha Qasymnyń ánderin oryndap synǵa túsken úmitkerlerdiń ónerin ánshi, Qazaqstan Respýblıkasynyń Tuńǵysh Prezıdenti-Elbasy qory syılyǵynyń laýreaty Serjan Musaıyn jáne Qazaqstannyń mádenıet qaıratkeri, Q.Baıjanov atyndaǵy konserttik birlestiktiń ánshisi Dáýrenbek Árkenov bastaǵan qazylar baǵalaǵan bolatyn. Bul atalymda Osakarov aýdanynan kelgen Saıan Bódesov bas júldeni jeńip aldy. Birinshi júlde Nurslan Saıdalınge buıyrsa, «Uldar» kvarteti ekinshi oryn ıegeri atandy. Al úshinshi júldeni Baqytjan Úısinbaev aldy.
Jeńimpazdar men júldegerlerdi marapattaý rásiminde baspadan jańa shyqqan «Qasym» atty kitaptyń tusaýkeseri ótti. Bul jınaqqa tanymal jazýshylardyń Qasym Amanjolov týraly ǵylymı maqalalary, esseleri, syn materıaldary jáne estelikteri toptastyrylǵan.
Al Qazaqstan Jazýshylar odaǵynyń múshesi, «Maǵjan» baspasynyń dırektory Almaz Myrzahmet kelesi jyly Qasym Amanjolov ánderiniń basyn quraǵan kitapty jaryqqa shyǵarý josparda bar ekenin aıtty.
Qaraǵandy oblysy