Ázirbaıjanda TMD Qorǵanys mınıstrleri keńesiniń otyrysy aıaqtaldy. Taraptar 2019 jylǵa qorytyndy jasap, 2025 jylǵa deıingi áskerı yntymaqtastyq tujyrymdamasynyń jobasyn qarastyrdy. Bul týraly Qorǵanys mınıstrliginiń baspasóz qyzmeti habarlady.
Otyrysqa Qazaqstan, Ázirbaıjan, Reseı, Belarýs, О́zbekstan, Tájikstan Qorǵanys mınıstrleri jáne Qyrǵyzstan Qarýly Kúshteri Bas shtabynyń bastyǵy qatysty.
Qatysýshylar 2025 jylǵa deıingi radıasııalyq, hımııalyq jáne bıologııalyq jaǵdaıdy baqylaý men baǵalaýdyń birikken júıesin damytý baǵyttaryn, normatıvtik jáne quqyqtyq qamtamasyz etý máselelerin talqylady. Sondaı-aq bilim berý, topografııalyq salada birlesken is-sharalardy ótkizý jáne aqparattyq jarııalaýda ózara is-qımyldy odan ári damytý máselelerin kóterdi.
Qazaqstan úshin TMD formatyndaǵy áskerı yntymaqtastyqtyń negizgi maqsaty – qorǵanys, áskerı qaýipsizdik salasyndaǵy ózara is-qımyldy qoldaý jáne qatysýshy memleketterdiń turaqty damýy.
Kezdesý qorytyndysy boıynsha qorǵanys mınıstrleriniń keńesi kezekti jylǵa arnalǵan birlesken is-sharalar keshenin bekitti, sondaı-aq onyń odan ári jumys isteýiniń qarjylyq aspektilerin jáne áýe-ǵarysh qorǵanysy mindetterin sheshýge beıimdelýdi qarady.
Sondaı-aq Ázirbaıjan prezıdenti Ilham Álıev qatysýshylardy qabyldady.