Qazaqstan Prezıdenti Q.Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynyń ózindik erekshelikteri bar. Meniń oıymsha, Joldaýda Memleket basshysynyń qoǵamǵa muqtaj nárselerdi túsine bilýi aıqyn baıqalady.
Q.Toqaev qoǵamdy alańdatyp otyrǵan birqatar problemalarǵa óz ustanymyn bildirdi. Bul oraıda, Prezıdent Elbasy ustanǵan baǵyttan taımaıtynyn aıta otyryp, osy baǵytty jalǵastyrý úshin júıeli túrde reformalar jasaý nıetin kórsetti. Bul oraıda, ol Joldaýda «Negizsiz, júıesiz saıası yryqtandyrý eldiń ishki saıası ahýalynyń turaqsyzdyǵyna, tipti memlekettilikten aıyrylýǵa ákelip soǵady. Sondyqtan biz saıası reformalardy «asyǵystyqqa salynbaı», kerisinshe, kezeń-kezeńimen, tabandy túrde jáne jan-jaqty oılastyryp júzege asyratyn bolamyz», dep atap kórsetedi. Prezıdent Q.Toqaevtyń bul nıeti is júzine asyryla bastady, máselen, kóp balaly analarǵa járdem kórsetý, shaǵyn bızneske jol ashý t.b. boıynsha qabyldanyp jatqan sharalar osyny dáleldep otyr.
Oǵan qosa, ol memlekettik organdardyń halyqpen tyǵyz jumys isteýin tapsyryp, «estıtin úkimet» jasaqtaýǵa shaqyrdy. Osynyń arqasynda qatardaǵy azamattar ákimnen bastap tikeleı Prezıdentke shaǵymdaný múmkindigine ıe boldy. Osy oraıda, Prezıdent elde bolyp jatqan jáne alańdaýshylyq týǵyzǵan oqıǵalarǵa aralasyp, ádildik ornatýǵa áreket jasaı bastady. Bul rette, Prezıdenttiń bastamasymen qurylǵan Ulttyq qoǵamdyq keńes te eldegi demokratııa ınstıtýttaryn damytýǵa úles qosýda. Keńestegi adamdar rotasııalyq negizde jumys isteýi onyń quramynyń únemi jańartylyp otyratynyn jáne azamattyq qoǵamnyń osy mańyzdy organynyń jumysyna belsendi lıderler kóptep qatysatynyn bildiredi.
Joldaýda sybaılas jemqorlyqqa qarsy kúres tolassyz júrgiziletini jáne bıýdjet qarajatyn durys paıdalanbaý faktileri odan ári áshkerelene beretini ashyq aıtyldy. Osyǵan baılanysty Nur-Sultan qalasynda salynyp jatqan jeńil relsti kólik tóńiregindegi daýdyń halyq aldyna shyǵarylýy osynyń aıǵaǵy dep aıtýǵa bolady.
Mýsa SAPAEV,
Qyrǵyzstan Jazýshylar odaǵynyń múshesi, qoǵam qaıratkeri