Jylý berý maýsymy bastalǵanyna kóp ýaqyt ótpeı oblysta eki adamnyń ıis tıip ýlanǵan oqıǵasy oryn aldy. 83 márte órt oqıǵasy bolyp, turǵyndar 2,5 mıllıon teńge zııan shekti.
Mamandardyń aıtýyna qaraǵanda, tilsiz jaýdyń qurbandarynyń sany ótken jyldarmen salystyrǵanda birshama azaıǵan. Áıtse de, qaýiptiń aldyn alyp, saq bolǵan lázim. Taıaýda departament qyzmetkerleri arnaıy reıd júrgizip, jer úılerde turatyn turǵyndardyń shańyraqtaryna ýly gazdan qorǵaıtyn arnaıy qondyrǵylar ornatty.
Tótenshe jaǵdaılar jónindegi departamentiniń mamandary Zastansıonnyı eldi mekenindegi áleýmettiń jaǵynan az qamtamasyz etilgen jáne kópbalaly otbasylarǵa bardy. Olardyń kóbi qaýipsizdik erejelerin muqııat saqtaı almaıdy. Oǵan turmystyq taýqymet sebep. Keıde salǵyrttyq ta oryn alady. Departament mamandary saqtyq sharalary jóninde túsindirip aıtyp, arnaıy qondyrǵylar ornatyp berdi. Úıden kúıik nemese tútin ıisi shyǵa qalsa, qondyrǵy birden dabyl qaǵady.
–Bıylǵy jylý berý maýsymy bastalǵaly Kókshetaý qalasynda 280-nen astam úıge osyndaı qondyrǵy ornattyq. Oblys boıynsha 800-ge jetkizdik. Osy baǵyttaǵy jumystar áli de jalǵasýda,– deıdi Aqmola oblysy tótenshe jaǵdaılar jónindegi departamentiniń basqarma bastyǵy Denıs Shelkoplıasov.
Qaýipsizdik sharalary áli de jalǵasatyn bolady. Jaratqannyń ózi «saqtansań, saqtaımyn» degen.
Kókshetaý qalasy