Almaty turǵyndary «Baǵanashyl» balalar úıi aýmaǵynda ornalasqan ǵımarattardyń biriniń buzylǵanyn, al ekinshisiniń terezesiz qalǵanyn baıqap, vıdeoǵa túsirip alǵan. Qala ákimdigi jaǵdaıǵa qatysty túsinikteme berdi, dep habarlaıdy Egemen.kz.
Almaty qalasynyń bilim basqarmasynyń málimetinshe, 2025 jylǵy 13 qazanda qala qurylys basqarmasy men Integra Construction JShS arasynda jańa nysandy jobalaý boıynsha yntymaqtastyq memorandýmy jasalǵan. Tehnıkalyq tekserý nátıjesinde ákimshilik, oqý korpýstary, sport jáne akt zaldary seısmıkalyq turǵydan jaramsyz dep tanylyp, buzýǵa sheshim qabyldanǵan. Qazirgi tańda demontaj jumystary tolyq aıaqtalǵan.
Joba aıasynda jataqhana korpýsyn qaıta jańartý, sondaı-aq jańa oqý, sport, ákimshilik ǵımarattar men ashana salý josparlanǵan. Qurylys jumystaryn osy jyldyń tórtinshi toqsanynda aıaqtaý kózdelgen.
Ákimdiktiń málimetine sáıkes, balalar Almatyda qalǵan. Olar 2024 jyldyń tamyz aıynda-aq arnaıy áleýmettik qyzmetterge muqtaj balalardy qoldaý ortalyǵyna kóshirilgen jáne sol jerde turyp jatyr.
Aıta keteıik, «Baǵanashyl» balalar úıine qatysty daý 2025 jyldyń kókteminen beri jalǵasyp keledi. Aldymen balalardy Almatydan Qonaevqa kóshirý josparlanǵany qoǵamda rezonans týdyrdy. Keıin bul sheshimge qarsy pikirler aıtylyp, túrli tekserýler júrgizildi.
Sońynda jaǵdaıǵa Prezıdent Qasym-Jomart Toqaev aralasyp, balalardy kóshirý toqtatyldy jáne qyzmettik tekserý taǵaıyndaldy. Osy oqıǵadan keıin birqatar laýazymdy tulǵalar jaýapkershilikke tartylyp, keıbiri qyzmetinen bosatyldy.