Ǵylym jáne joǵary bilim mınıstrliginiń málimetine sáıkes 10 mamyrdan bastalǵan negizgi Ulttyq biryńǵaı testileý osy ýaqytqa deıin shamamen 139 myń ret tapsyrylǵan.
Testileýge qatysýshylardyń 71 paıyzy qazaq tilin, 29 paıyzy orys tilin tańdaǵan. Sonymen qatar talapkerler testini 259 ret aǵylshyn tilinde tapsyrǵan. Úshinshi aptanyń qorytyndysy boıynsha talapkerlerdiń 67 paıyzy shekti ball jınaǵan. Al bes pán negizinde ortasha nátıje 65 baldy qurady. Eń joǵary kórsetkish – 140 ball. Bul nátıjege ázirshe
7 oqýshy, atap aıtsaq, Jambyl oblysy Qulan aýdanynan Nazerke Sársenbaı, Semeıden Erasyl Saılaýov, Túrkistan qalasynan Aısultan Jańbyrbaı men Jasýr Nyshanbaı, Taraz qalasynan Nurǵanat Qanat, Qyzylorda qalasynan Káýsar Altynsary, Pavlodar oblysynan Áset Altaır qol jetkizdi.
Mınıstrlik dereginshe, erekshe bilim berý qajettiligi bar talapkerler úshin de qajetti jaǵdaı jasalǵan. Bıylǵy testileýge atalǵan sanattaǵy 392 talapker qatysqan. Testileý barysynda talapkerlerge apellıasııa berý múmkindigi qarastyrylǵan. Test tapsyrmalarynyń mazmunyna qatysty ótinishter emtıhan aıaqtalǵannan keıin 30 mınýt ishinde qabyldanady. Al tehnıkalyq máseleler boıynsha apellıasııa testileý kezinde beriledi. Nátıjeler kórsetilgen sertıfıkattar apellıasııa qaralǵannan keıin jeke kabınetterde qoljetimdi bolady.
«UBT bastalǵaly beri úsh apta ishinde 283 ereje buzýshylyq tirkelgen. Onyń ishinde 168 talapker smartfon, smart kózildirik, mıkroqulaqqap, basqa da tyıym salynǵan zattardy alyp kirmek bolǵany úshin testileýden shettetilgen. Sondaı-aq 115 adam testileý kezinde erejelerdi buzǵandyqtan aýdıtorııadan shyǵarylyp, olardyń nátıjeleri joıylǵan. О́zge adamnyń ornyna test tapsyrý derekteri anyqtalmaǵan. Mınıstrlik ókilderiniń habarlaýynsha, UBT aıaqtalǵannan keıin de baqylaý jumysy jalǵasady. Osy jyldyń
31 qazanyna deıin beınejazbalarǵa taldaý júrgizilip, ereje buzý faktileri anyqtalǵan jaǵdaıda talapkerlerdiń nátıjeleri jaramsyz dep tanylady», delingen.
Aıta keteıik, bıyl negizgi UBT-ǵa qatysýǵa 240 myńǵa jýyq talapker eki múmkindik boıynsha jalpy sany 446 myńnan astam ótinish bergen.
Arýjan DOSYMHAN,
E.A.Bóketov atyndaǵy Qaraǵandy ulttyq zertteý ýnıversıtetiniń stýdenti