Mektep oqýshylary jazǵy demalys kezinde resmı túrde jumys istep, 100 myń teńgege deıin tabys taba alady. Bul múmkindik 14 jastan asqan azamattarǵa arnalǵan. Bos oryndar tizimi Enbek.kz platformasyndaǵy «Meniń jazǵy demalysym» bóliminde jarııalanady.
Jasóspirimderdiń eńbegi arnaıy zańdyq talaptarmen retteledi. Iаǵnı ata-ananyń kelisimin alý mindetti. Sondaı-aq túngi ýaqytta eńbek etýge, qaýipti jumysqa qatań tyıym salynady. Al eńbekaqy mólsheri qoǵamdyq jumystarda 94 myń teńgeden bastalsa, «Jasyl el» baǵdarlamasynda 60-150 myń teńge aralyǵynda bolady. Ortasha tabys 80-100 myń teńge kóleminde.
Júıeniń jumys algorıtmi oqýshylardyń jas ereksheligine beıimdelgen. Portalda aldymen ata-anasy nemese zańdy qamqorshysy jeke kabınet ashyp, tirkeýden ótedi. Júıe ıntegrasııa arqyly balanyń derekterin avtomatty túrde kórsetedi. Eger otbasynda birneshe bala bolsa, ata-ana qaı balaǵa jeke kabınet ashatynyn ózi tańdaıdy. Tirkeý rásimi aıaqtalǵannan keıin jeke kabınet iske qosylady.
Odan keıin oqýshy júıege kirip, óz túıindemesin toltyrady. Jumysqa qatysty shaqyrtýlar osy kabınetke túsedi. Bastysy, ata-analar balalardyń eńbek úderisin tolyq baqylaıdy. 16-18 jas aralyǵyndaǵy jasóspirimder elektrondyq sıfrlyq qoltańba arqyly jeke kabınet asha alady.
Negizi jasóspirimder jazda kóbine dámhana, saýda, jetkizý qyzmeti, jarnama taratý, kógaldandyrý jáne maýsymdyq jumysta eńbek etip júr. Bul – bir jaǵynan jasóspirimderdiń tájirıbe jınaqtap, eńbek daǵdylaryn qalyptastyrýyna múmkindik. Odan bólek, oqýshylar jaýapkershiliktiń mánin túsinip, ýaqytty tıimdi josparlaýdy meńgeredi.
Nuraı MUHANOVA,
L.N.Gýmılev atyndaǵy EUÝ
Jýrnalıstıka jáne áleýmettik ǵylymdar joǵary mektebiniń
2-kýrs stýdenti