Qyzylaǵashtaǵy qaıǵyly oqıǵa óndiristi óńir jurty kókiregine de qatty batty. Tosyn apattan opat bolǵandardyń otbasylary men zardap shekkenderdiń qasireti árkimniń de et-júregin eljiretti. Olarǵa kómek kórsetýge aldymen ún qosqan shaǵyn jáne orta bıznes ókilderiniń úlken toby tabystarynyń bir bóligin qoldaý qoryna aýdarýdy sheshti.
Áriptesterin qaıyrymdylyqqa jumyldyrýshylardyń biri “Aspap” JShS jetekshisi, oblystyq máslıhat depýtaty Tólegen Áshimov óz atynan 200 myń teńge arnaýmen birge kásiporynnyń Qyzylǵashta birneshe turǵyn úı salýdy sheshkendigin keshe tilshiler qosynyna habarlady. Sonymen qatar kásipkerlerdiń oblystyq qaýymdastyǵynyń atqarýshy dırektory Gúlnár Qurbanbaeva málim etkendeı, isker toptar birigip 5 mıllıon teńge aýdarýdy uıǵardy. Al bul kúnde sondaı-aq qıim-keshek, azyq-túlik jóneltilýde.
Jekelegen azamattar men qoǵamdyq uıymdardyń, bıznestik salanyń osyndaı qoldaýyna qosa oblys óz tarapynan 50 mıllıon teńge materıaldyq kómek kórsetpek.
Aıqyn NESIPBAI.
QARAǴANDY.