Aqtóbe topyraǵy qaı kezde de talanttarǵa kende bolyp kórgen emes. Keshegi tarlan talanttar Tahaýı Ahtanov, Tobyq Jarmaǵambetov, Saǵı Jıenbaevtar salǵan izdiń súrleýi kómeski tartpaı keıingi býyn qalamgerler qatary jyldan jylǵa kóbeıip keledi.
Budan 7-8 jyl buryn aqtóbelik aqyn-jazýshylarynyń 50 tomdyq serııalyq jınaqtaryn shyǵarý isi belgilengen edi. Munda eń aldymen eń daryndy degen orta jáne keıingi býyndaǵy shyǵarmashylyq ókilderiniń kitaptaryn shyǵarýǵa basymdyq berildi.
Osy oraıda atap óterlik jáıt kórkem ádebıet úshin qajetti serııanyń buǵan deıin 23 tomy baspadan jaryq kórgendigi. Taıaýda aqtóbelik zııaly qaýym ókilderi taǵy bir jaǵymdy jańalyq pen shyrqaýy kelgen shyǵarmashylyq istiń kýágeri boldy. Atap aıtqanda belgili aqyn kósem sóz sheberi, óńiraralyq «Adyrna» jýrnalynyń bas redaktory Meıirhan Aqdáýlet bastamasymen «Aqtóbe kitaphanasy» serııasy boıynsha jergilikti aqyn-jazýshylardyń 27 tomlyq eńbekteri taǵy da jaryq kórdi.
Sonymen qatar 23 ke 27 qosqanda elý tom bolyp Qazaqstan jazýshylar odaǵy Aqtóbe oblystyq bólimshesi men Aqtóbe oblystyq ákimdigi birlesip qolǵa alǵan jobanyń núktesi qoıyldy. Aqjar ABK JShS baspahanasynan basylyp shyqqan kitaptardyń ár qaısynyń taralymy myń dana. Ári onyń árqaısynyń kólemi baspa tabaq tóńireginde. 27 tomdyq jınaqqa Aqtóbeden shyqqan belgili aqyn-jazýshylar men keıingi jas tolqyn ókilderiniń tańdaýly týyndylary engizilgen. Aldaǵy kezde elý tomdyq tolyq serııamen jaryq kórgen Aqtóbe aqyn-jazýshylarynyń jınaǵy óńirdegi barlyq kitaphanalarǵa qoıylyp kópshilik olardyń shyǵarmashylyǵymen tanysýǵa mol múmkindik almaq.