Elordada Qazaqstannyń Bas memlekettik eńbek ınspektory Tólegen Ospanqulovtyń tóraǵalyǵymen «Qaýipsiz eńbek jaǵdaılaryn qamtamasyz etý» taqyrybynda semınar ótti. Is-shara barysynda jumys oryndaryndaǵy qaýipsizdik tehnıkasyn saqtaý máseleleri, sondaı-aq eńbekti qorǵaý salasyndaǵy qazirgi problemalar jáne ony sheshý boıynsha qabyldanǵan sharalar qaraldy.
Semınarǵa Aqmola, Qaraǵandy, Qostanaı, Soltústik Qazaqstan oblystarynyń jáne Nur-Sultan qalasynyń bas memlekettik eńbek ınspektorlary, Indýstrııa jáne jańa tehnologııalar mınıstrligi О́nerkásiptik damý jáne ónerkásiptik qaýipsizdik komıtetiniń, Densaýlyq saqtaý mınıstrliginiń, Kásipodaqtar federasııasynyń, «Atameken» UKP, «EQRǴZI» RMKK, «QazMunaıGaz» UK» AQ, «Qazaqstan temir joly» AQ, «Qazatomónerkásip» UAK» AQ jáne «BI Group» holdınginiń ókilderi qatysty.
«Qaýipsiz eńbek jaǵdaılaryn qamtamasyz etý – bul Eńbek jáne halyqty áleýmettik qorǵaý mınıstrliginiń mańyzdy basymdyqtarynyń biri. Aǵymdaǵy jyly «Qaýipsiz jumys» aqparattyq naýqany aıasynda biz «Atameken» UKP, Kásipodaqtar federasııasy jáne múddeli memlekettik organdar ókilderiniń qatysýymen óńirlerde 4 klasterlik semınar ótkizýdi josparlap otyrmyz. Qyzmetkerlerge qolaıly eńbek jaǵdaılaryn jasaýǵa baǵyttalǵan birlesken kúsh-jigerimiz ǵana kásibı qaýipterdi azaıta alady», dedi Tólegen Ospanqulov is-sharanyń ashylýynda.
Semınarda sóz sóılegen Bas memlekettik eńbek ınspektory zııandy eńbek jaǵdaılary bar jumys oryndarynyń sanyn azaıtýdyń mańyzyn atap ótti. Búginde zııandy jáne qaýipti eńbek jaǵdaılarynda Qazaqstannyń 497 myń qyzmetkeri jumys isteıdi, olar úshin jumys berýshiler qyzmetkerdiń tabysynan 5% mólsherinde mindetti kásiptik zeınetaqy jarnalaryn aýdaratynyn atap ótti.
«Statıstıka jónindegi ýákiletti organnyń málimetteri boıynsha, 2018 jyly saýaldamaǵa qatysqan kásiporyndardyń 1,6 mıllıon qyzmetkeriniń 373 myńy nemese tórtten biri zııandy jáne qaýipti eńbek jaǵdaılarynda jumyspen qamtylǵan. Byltyr 676 myń jumysshy zııandy eńbek jaǵdaıyndaǵy jumysy úshin ártúrli ótemaqy aldy. Bul úshin jumys berýshilerge 116,3 mlrd teńge bólindi, bul 2017 jylmen salystyrǵanda 8%-ǵa kóp», dedi ol.
О́z kezeginde Qazaqstan Kásipodaqtar federasııasy Áleýmettik-ekonomıkalyq qatynastar jáne áleýmettik seriktestik komıtetiniń tóraǵasy Gúlnar Jumageldıeva qatysýshylarǵa respýblıka kásiporyndarynda júrgizilip jatqan áleýmettik baqylaý týraly aıtyp berdi.
«Atameken» UKP Adamı kapıtaldy damytý jáne áleýmettik kásipkerlik saıasaty komıtetiniń tóraǵasy Talǵat Doskenov «Atameken» UKP-nyń qaýipsiz eńbek jaǵdaılaryn jaqsartý jónindegi usynystaryn jetkizdi.
Indýstrııa jáne jańa tehnologııalar mınıstrligi О́nerkásiptik damý jáne ónerkásiptik qaýipsizdik komıteti tóraǵasynyń orynbasary Nyǵmedjan Maqajanov semınar qatysýshylaryna qaýipti óndiristik nysandardaǵy ónerkásiptik qaýipsizdik salasyndaǵy memlekettik baqylaýdy qamtamasyz etý týraly habarlady.
Is-sharany qorytyndylaı kele, Tólegen Ospanqulov qaýipsizdik pen eńbekti qorǵaýdy uıymdastyrý boıynsha tıisti naqty usynymdar berdi.
Esterińizge sala keteıik, Eńbek jáne halyqty áleýmettik qorǵaý mınıstrligi 2019 jyldy «Eńbek qaýipsizdigi jáne eńbekti qorǵaý jyly» dep jarııalaǵan bolatyn. Osyǵan baılanysty respýblıkada atalǵan taqyrypqa arnalǵan birneshe is-shara ótkiziledi. Bul semınar sonyń biri. Negizgi maqsaty – óndiriste qaýipsiz eńbek jaǵdaılaryn qamtamasyz etý boıynsha memlekettik organdardyń, bıznestiń jáne qoǵamdyq uıymdardyń kúsh-jigerin biriktirý.