Búgin L.N.Gýmılev atyndaǵy Eýrazııa ulttyq ýnıversıtetiniń uıymdastyrýymen «Egemen Qazaqstan» gazetiniń 100 jyldyq mereıtoıyna arnalǵan «Jahandyq medıakeńistiktegi baspasózdiń róli men damý tendensııalary» atty halyqaralyq ǵylymı-tájirıbelik konferensııa ótti.
«Egemen Qazaqstan» gazetiniń 100 jyldyq mereıtoıyna arnalǵan halyqaralyq ǵylymı-tájirıbelik konferensııada jahandyq medıakeńistiktegi jańalyqtar men ózgerister, buqaralyq kommýnıkasııa máseleleri, gazet naryǵynyń qyr-syry, jýrnalıstıka janrlarynyń búgingi túrlený úderisi talqylandy.
Fılologııa ǵylymdarynyń doktory Dıhan Qamzabekulynyń moderatorlyǵymen ótken konferensııaǵa QR UǴA akademıgi, ádebıettanýshy Serik Qırabaev, ǵalym Qoıshyǵara Salǵarauly qatysyp, L.N.Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory Namazaly Omashev, E.Bóketov atyndaǵy QarMÝ professory, fılologııa ǵylymdarynyń doktory Jandos Smaǵulov, Mehıko Týrızm tehnologııasy ýnıversıtetiniń magıstri Jose Umberto Baeso Estrada, jýrnalıstıka jáne saıasattaný fakýltetiniń dekany, professor Qaırat Saq baıandama jasady.
Shara barysynda belgili ádebıettanýshy Serik Qırabaev pen ǵalym Qoıshyǵara Salǵaraulyna gazettiń 100 jyldyq mereıtoıyna arnalǵan medal tabystaldy. Sondaı-aq ýnıversıtet tarapynan «Egemen Qazaqstan» gazetiniń qalamy júırik jýrnalısteri Talǵat Batyrhan, Beken Qaıratuly men Dýman Anashqa medal taǵylyp, Amangeldi Qurmetuly, Súleımen Mámet pen Jylqybaı Jaǵypar alǵyshatpen marapattaldy.
Basylymnyń 100 jyldyq mereıtoıy aıasynda ýnıversıtettiń Jýrnalıstıka jáne saıasattaný fakýlteti baspasóz jáne baspa isi kafedrasy «Egemen Qazaqstan» gazetiniń 10 kúndigin» ótkizedi.
Onkúndik aıasynda «Egemen Qazaqstan» gazetiniń basqarma tóraǵasy D.Qydyráliniń sheberlik saǵaty ótedi. Sondaı-aq basylym veb-redaksııasynyń jumysy, fotojýrnalıstıka, dızaın jasaý tehnologııasy jaıly semınar-trenıng, gazet tilshilerimen sheberlik sabaqtary, kezdesý uıymdastyrylady.