Bıyl Qazaqstan Jazýshylar odaǵynyń qurylǵanyna 85 jyl tolyp otyr. Osy mereıli data sheńberinde elimizdiń túkpir-túkpirinen jınalǵan qalamgerler Aqtóbede bas qosty.
Kez-kelgen úlkendi-kishili kezdesýdiń arqa tutar belgili bir qazyǵy men toqaılasar tusy bolatyny tabıǵı jáıt. Osy oraıda «Ádebıet.Rýh.Qoǵam» atty respýblıkalyq ádebıet forýmy Aqtóbede ótkizilgen irgeli jıynnyń basty baǵyty men jolyn aıqyndap berdi deýge ábden bolady. Onyń ashylý saltanaty kezinde Aqtóbe oblysynyń ákimi Ońdasyn Orazalın rýhanı qundylyqtardy baǵalaı bilýdiń basty joldarynyń biri ádebıet pen ónerge kórsetiletin qoldaý jáne el qalamgerleriniń shyǵarmashylyq qyzmetine janashyrlyq tanytý ekenin atap kórsetti. Budan ári óńir basshysy Aqtóbede respýblıkalyq deńgeıde uıymdastyrylǵan ádebı jıyn osy nıet pen maqsattan bastaý alǵanyn aıta kelip, bul qadam jas urpaqtyń boıynda kórkem ádebıetti súıe bilý men ony oqý daǵdylaryn qalyptastyrýǵa yqpal jasaı alatynyn jetkizdi.
Sodan soń Qazaqstan Jazýshylar Odaǵynyń tóraǵasy Ulyqbek Esdáýlet zamanalar zymyrap ótetini, dáýirler aýysatyny, onyń bári de ótkinshi ekendigi osyndaıda sóz, sonyń ishinde kórkemsóz esh ýaqytta ólmeıtini jóninde oı tolǵady. Ádebıettiń qadir-qasıeti men qoǵamda alatyn róli jóninde sara sóz, qalamgerlerdiń osyndaı basqosýynda aıtylmaǵanda qandaı jerde aıtylady. Bul turǵyda qaı kezde de talanttarǵa kende bolyp kórmegen Aqtóedegi ókiletti organ jetekshilerimen ádebıet janashyrlary taǵylym tutarlyq iske bastamashy bolyp otyr. Sol úshin olarǵa barlyq respýblıka qalamgerleriniń atynan rızashylyq pen alǵys sezim bildiremin dep túıindedi óz oıyn U.Esdáýlet. Sondaı-aq respýblıkalyq ádebıet forýmynyń ashylý rásimi kezinde qazaqtyń belgili aqyn qyzy, memlekettik syılyqtyń laýreaty Aqushtap Baqtygereevanyń júrekjardy lebizi de yqylaspen tyńdaldy. Bizge babalardan qalǵan eń úlken mura –halyq aýyz ádebıeti ıaǵnı óleń men maqal ekenin umytpaýymyz kerek. О́mir- ananyń áldeıimen bastalyp, joqtaýymen aıaqtalady. Munyń ekeýi de quıylyp turǵan óleń. Búgingi kúni biz ózimizdiń rýhanı qundylyqtarymyzdan alystap, jastarǵa beriletin tárbıe solǵyn tartqan tusta ádebıet pen qazaqtyń qalamgerlerin qoldaýǵa baǵyttalǵan qadamdardyń qolǵa alynýy – quptaýǵa turarlyq is dep sabaqtady ol óz oıyn.
Úsh kúnge sozylǵan jazýshylar forýmynyń baǵdarlamasy sanalýan túr men mazmunǵa toly boldy. Onyń aıasynda Aqtóbe aımaǵynan shyqqan kesek talant ıeleri Iztaı Mámbetovtyń 90, Saǵı Jıenbaev pen Tobyq Jarmaǵambetovtyń týǵanyna 85 jyl tolýyna oraı olardy eske alý sharalary iske asty. Sonymen birge ádebıet pen ónerdi qoldaý maqsatynda Aqtóbe aımaǵynda qolǵa alynǵan birqatar tyń jobalardyń tusaý keseri ótkizildi. Bir sózben aıtqanda Aqtóbede ótkizilgen respýblıka qalamgerleriniń forýmynda týǵan ádebıetimizdiń búgini men erteńi týraly paıymdy túıinder jasaldy. Sonymen birge qoǵam músheleriniń boıyna rýhanı adamgershilik dánin sińirýge qatysty ádebıettiń baǵa jetpes orny jóninde tolymdy da tolǵaqty oı-pikirler ortaǵa tastaldy.
AQTО́BE