Jyldar boıy jınaǵan mashyǵyn óz kásibin kórkeıtýge ǵana jumsamaı, ózgeniń násibin molaıtýǵa baǵyshtaǵan izgi de isker jandar men qoǵamdyq uıymdar qashanda bıik qurmetke laıyq. Bıyl tuńǵysh ret tomaǵasyn sypyrǵan «Ózgeris ustasy» respýblıkalyq syılyǵy osy maqsatty murat tutqan eńbekkerlerdi qanattandyra túsken aıryqsha joba dep aıta alamyz.
Kásipkerlikti damytýǵa qosqan qomaqty úlesi úshin Almaty tórinde marapattalǵan bir top kásip ıeleri – qoǵamdaǵy túrli túıtkildiń túıinin tarqatyp, áleýmettik kásipkerliktiń san salasynda aınalasyna shýaǵyn shashqan jigerli jandar. Bilim berý, ekologııa jáne osal toptarmen jumys isteý salalarynda úzdik úlgi tanytqandar 500 myń teńge kóleminde syıaqyǵa ıe boldy. Birinshi kezeńde fınalısterdi úkimettik emes uıymdardan túsken ótinimder negizinde otandyq jáne sheteldik eksperttik uıymdar ókilderinen quralǵan arnaýly komıssııa tańdaǵan edi. Al olardyń arasynan júzden júırik shyqqandardy onlaın daýys berý arqyly el turǵyndary anyqtaǵan bolatyn.
Sonymen «Ózgeris ustasy» respýblıkalyq syılyǵynda Salem Social Village ujymy, «KOMÝNITIPLIýS» mádenıet, áleýmet jáne bilim berýdi damytý qory», «Aıalaǵan alaqan» qoǵamdyq qaıyrymdylyq qory áleýmettik kásipkerliktiń bilim salasyndaǵy úzdik úlgisi nomınasııasynda jeńimpaz dep tanyldy. Al áleýmettik osal toptardy qoldaý salasyndaǵy áleýmettik kásipkerliktiń úzdik úlgisi atalymynda «Erekshe ómir» múgedek balalardy aqparattyq-úılestirý resýrstyq qoldaý ortalyǵy», «Jambyl oblysynyń kommersııalyq emes uıymdarynyń qaýymdastyǵy» zańdy tulǵalar birlestigi, «Ski Park Pioneer» JShS, Aǵabek Qarabekov atyndaǵy qoǵamdyq qor, «JARQYN BOLASHAQ» jastar qoǵamdyq qory, «Strana masterov» múgedekterdiń qoǵamdyq qory, «Móldirkóz» qoǵamdyq birlestigi, «Psıhoanalıtıcheskaıa assosıasııa» qoǵamdyq birlestigi, «Federasııa paýerlıftınga ı jıma leja Mangıstaýskoı oblastı» qoǵamdyq birlestigi júzden júırik atandy.
«Arnaý» damý ortalyǵy» qoǵamdyq birlestigi, «Jaıyq-Kaspıı Orhýss ortalyǵy» korporatıvtik qory, EcoWasteAktau ujymy tuńǵysh ret tabystalyp otyrǵan «Ózgeris ustasy» syılyǵynyń ekologııa salasynda kósh bastady.
Sonymen birge áleýmettik kásipkerlikti qoldaý boıynsha korporatıvti sektordyń úzdik bastamasy nomınasııasynda Chevron kompanııasy, «Úzdik memlekettik shara» atalymynda Samuryq-Qazyna Trast, Halyqaralyq ınstıtýttyń úzdik bastamashysy retinde Halyqaralyq damý jónindegi AQSh agenttigi dara shyqty.
Jeńimpaz dep tanylǵandar bıznes pen qoǵam arasynda dıalog ornatyp qana qoımaı, el azamattarynyń ómir sapasyn jaqsartýǵa úles qosqan ujymdar.
«Búgin biz Qazaqstandaǵy áleýmettik kásipkerliktiń alǵashqy qarlyǵashtaryn qurmettedik. Olardyń biregeıligi – áleýmettik máselelerdiń sheshimin tabýynda ǵana emes, sheshimdi turaqty bıznes modelderge negizdeı otyryp sheshýinde. Qarapaıym tilmen aıtqanda, olar bizdiń qoǵamǵa kómektesedi ári osy qyzmeti arqyly tabys tabady jáne halyqtyń áleýmettik álsiz toptaryna aqsha tabýǵa múmkindik beredi. Aty aıtyp turǵandaı «ÓZGERIS USTASY» – qoǵamǵa ózgeris ákeletin elimizdiń naǵyz kaharmandaryn, ózgeris ustalaryn anyqtaıtyn baıqaý. Osy kisiler bizdiń jas urpaǵymyzǵa úlgi bolýy kerek», deıdi ImpactHub Almaty basshysy Indıra Shah.
Búgingi tańda elimizde 150-ge jýyq áleýmettik kásipker belsendi qyzmet etip keledi. Kesh barysynda olardyń alǵashqy respýblıkalyq reestriniń tanystyrylymy ótip, bul saladaǵy elimizdiń eń belsendi aımaqtary anyqtaldy. Úzdikterdi marapattaý rásimi óner juldyzdarynyń konsertine ulasyp, kásipkerler qolynan shyqqan erekshe ónimder jármeńkesi kópshilik nazaryna usynyldy.
Sóz oraıy kelgende osynaý aıryqsha jobany «Act for Impact» (Impact Hub Almaty) korporatıvtik qory Aqparat jáne qoǵamdyq damý mınıstrliginiń qoldaýymen «Azamattyq bastamalardy qoldaý ortalyǵy» (ÚEAQ) granty aıasynda uıymdastyrǵanyn aıta ketken jón.
ALMATY