Bas basylymnyń ǵasyrlyq toıy da kelip jetti. Gazetke arǵy-bergide basshylyq etken qalamgerlerdi, qaıratkerlerdi, redaksııa ardagerlerin qurmet tutatyn, eńbegin aıshyqtap aıtatyn jaqsy dástúrimizben olar jaıynda júıeli jazyp ta, estelik maqalalaryn, suhbattaryn jarııalap ta júrmiz. Toı qarsańyndaǵy qurmetti sóz kezegi bas gazetti eń uzaq basqarǵan tulǵa – Parlament Májilisiniń depýtaty, kórnekti pýblısıst, ádebıettanýshy Saýytbek ABDRAHMANOVQA berilip otyr.
«Meni gazetke alyp kelgen – Aıtmatov...»
– Saýytbek aǵa aldymen sózdi osy gazetke qalaı kelgenińizdi aıtýdan bastaıyqshy. Ol kezde ýnıversıtetti bitire sala Ortalyq komıtettiń baspasóz organyna ornalasý qıyn ekeni belgili ǵoı.
– Durys aıtasyz: ýnıversıtet bitire sala basty partııalyq gazetke qabyldaný ol jyldarda tipti oqys oqıǵadaı edi. «Sosıalıstik Qazaqstanǵa» qyzmetkerler «Lenınshil jastan», «Qazaq ádebıetinen», oblystyq gazetterden ǵana alynyp jatatyn. Sodan da munda kileń saqa jýrnalıster jumys isteıtin. Talaı jurt tosyrqaı qaraǵan sol batyl qadamdy jasaǵan asyl adam – gazetti 1973-1983 jyldarda basqarǵan Sapar Baıjanov. Áıtse de, meniń máselemniń sheshilýine, túptep kelgende, ataqty Aıtmatov aralasty...
Shyńǵys Aıtmatovtyń «Sosıalıstik Qazaqstannyń» kadryna naqty qandaı qatysy bolýy múmkin dep tańdanyp otyrǵanyńyzdy baıqaımyn. Aıtaıyn. Jýrfaktyń besinshi kýrsynda júrgende Memlekettik kıno komıtetine jumysqa ornalasqan edim. Ssenarıı alqasynyń derekti fılmder jónindegi redaktory bolyp. Tamasha qyzmet. Oqıtynyń – ssenarıı, kóretiniń – kıno, Komıtet tóraǵasy – aıtýly pýblısıst Kamal Smaıylov, Komıtettiń bas redaktory – Qaltaı Muhamedjanov, kınostýdııanyń bas redaktory – Ábish Kekilbaev... Aǵalarymnyń maǵan qabaǵy jaqsy. О́mirdiń, ónerdiń, ónegeniń naǵyz mektebi. Áıtse de, «Jýrnalıst bolamyn dep oqydym ǵoı, bári qalaı ózgerip ketti ózi?..», dep ekioıly kúıde qalatyn kezderim de az emes-ti. Onyń ústine gazettiń ádebıet jáne óner bóliminiń meńgerýshisi Bolat Bodaýbaev: «Túbi seni biz shaqyratyn shyǵarmyz. Sapekeń jazǵandaryńdy maqtaıdy. «Jumysqa alamyz» dep qoıady», deıtin. Stýdent kezde «Sosıalıstik Qazaqstannyń» ózine biraz shyqqanmyn. Bıyl «Folıant» baspasynan «О́ner ólkesi» degen kólemdi kitabym jaryq kórdi, sonyń shamamen 150 betteılik alǵashqy taraýy «Stýdent dápterinen» dep atalady, bári ýnıversıtette júrgende jarııalaǵan kıno, teatr, mýzyka týraly resenzııa, maqala, suhbattarym. Aldyńǵy jyly basylǵan «Ádebıet álemi» degen kitabymda da stýdenttik jyldarda jazǵandarym bar. Úmittenetin jónim joq emes sııaqty. Biraq naqty áńgime qozǵalmaıdy. Ýaqyt ótip jatyr. Taǵy bir maqalamdy alyp barǵanda naqty suraýǵa týra keldi... Bolat Qamıuly bylaı dedi: «Oı, baýyrym, saǵan aıtýǵa yńǵaısyzdanyp júr edim. Oıymyz bolmaıtyn boldy. Sapekeń Kamal Smaıylovpen sóılesken eken, ol kisi: «Sizge jýrnalıst tabý qıyn emes, bizge kınonyń mamanyn tabý qıyn. Ásirese qazaqtyń janyn biletin, qazaqsha jazatyn adam az. Kileń asfaltta týǵandar... Ol jigitti biz Máskeýge, eki jyldyq kýrsqa jibermekshimiz. О́zimizde ornyqtyrmaqshymyz. Bizdi qınamasańyz eken», depti... Ana joly seni taǵy bir aıtyp edim, «Endi bul áńgimeni qozǵamaıyq. Yńǵaısyz bolady Kamaldan», dedi»... Men ne aıtamyn? Buıyrmaǵan shyǵar dedim de qoıdym. Sóıtip júrgende ýnıversıtettegi oqý da bitti. Kınodaǵy jumysymdy jalǵastyra berdim. Sol jylǵy kúzde Almatyǵa Shyńǵys Aıtmatov kele qaldy, óziniń shyǵarmasy boıynsha túsirilgen fılmdi Kıno úıinde kórsetti. «Lenınshil jastyń» tapsyrmasymen ol kisiden kólemdi suhbat aldym. Gazetke 1975 jyldyń 26 qarashasynda «Qaıtkende adam qalady adam bolyp?!» degen atpen shyqty. Jarııalanym jurttyń nazaryn aýdardy. Erteńinde-aq Sapar Baıjanovqa shaqyryldym... Arada eki kún ótkende redaksııanyń ádebıet jáne óner bóliminiń bildeı qyzmetkeri bolyp shyǵa keldim. Jaqsydan sharapat degen sol. Qalamdas dosynyń sózin jerge tastaı almaı, raıynan qaıtqan Sapar aǵanyń sheshimin ózgertýge adamzattyń Aıtmatovymen jasalǵan suhbattyń naqty áseri bolǵany anyq edi. Sondyqtan bir jaǵynan, meni gazetke alyp kelgen Aıtmatov desem de artyǵy joq. Shyńǵys aǵaǵa osy úshin rahmetimdi keıinirek, 1997 jyly, Mádenıet mınıstriniń birinshi orynbasary bolyp júrgenimde telavtormen birigip jazǵan pesasy boıynsha spektakl qoıylǵanda Bishkektegi teatrdyń sahnasynan aıtqanym da bar.
«Segiz kúnde bes elde»...
– Rasynda da, siz talaı ataqty adamdarmen suhbat jasaǵansyz. Olardyń arasynan kimderdi erekshe atar edińiz?
– Suhbat jasaýǵa jastaı beıimdelip óskenime áýeldegi bes jylda ádebıet jáne óner bóliminde isteýimniń de áseri boldy. Basqa bólimderge qaraǵanda, suhbat janry bizde kóbirek qoldanylatyn. Ol kezde laýazymdy qyzmettegi adamdardyń, ádebıetten, ónerden, ǵylymnan, sporttan basqa salalardaǵy kisilerdiń suhbat berýi ilýde bir kezdesetin edi ǵoı. Jurttyń az sóıleıtin kezi... Sol jyldarda Ǵabıt Músirepov, Serke Qojamqulov, Sábıra Maıqanova, Lıýdmıla Zykına, Mahmýd Esembaev, Evgenıı Matveev, Oljas Súleımenov, Nurmuhan Jantórın sııaqty talaı tulǵadan suhbat alýdyń sáti tústi. 2000 jyly «Egemen Qazaqstanǵa» qaıtyp kelgennen keıin suhbattasqan adamdardyń arasynan Shyńǵys Aıtmatov, Sergeı Mıhalkov, Mıhaıl Ýlıanov, Andreı Konchalovskıı, Natalıa Arynbasarova, Bıbigúl Tólegenova, Gúlfaırýz Ysmaıylova, Oljas Súleımenov, Ábish Kekilbaev, Sergeı Solovev, Tóregeldi Sharmanov, Asanáli Áshimov, Sábıt Orazbaev, Satybaldy Narymbetov, Darıǵa Tnalına, Nıkolaı Anastasev sekildi esimderdi bóle ataı alamyn. Grýzııanyń eks-prezıdenti Edýard Shevardnadzemen, Tájikstan prezıdenti Emomolı Rahmonmen, amerıkalyq belgili tarıhshy, saıasattanýshy Marta Brıll Olkotpen, Báıken aǵa Áshimovpen, «Qurannyń» poetıkalyq aýdarmasyn jasaǵan ımam Valerııa Porohovamen jasalǵan suhbattar da ózime unaıdy. Jalpy, suhbatqa qoıylatyn talap ártúrli. Keıde oqyrman úshin onsha tartymdy, qyzǵylyqty kórinbeıtindeı, biraq ótetin ne ótken oqıǵanyń alatyn ornyn, sony uıymdastyrǵan eldiń salmaǵyn sezindirý úshin jasalatyn, saıası turǵydan asa qajetti, óte jaýapty suhbattar da bolýy múmkin. Mysaly, Eýropadaǵy Qaýipsizdik pen yntymaqtastyq uıymynyń 2010 jylǵy Astana sammıtiniń aldynda aınalasy segiz kúnniń ishinde Eýropanyń bes elinde bolyp, alty birdeı suhbat alyp qaıttym. EQYU Bas hatshysy Mark Perren dı Brıshambo, EQYU Parlamenttik Assambleıasynyń qurmetti tóraǵasy Joao Soaresh, EQYU Parlamenttik Assambleıasy tóraǵasynyń orynbasary Aleksandr Kozlovskıı, EQYU Parlamenttik Assambleıasy tóraǵasynyń orynbasary Bendjamen Kardın, EQYU-nyń Az ulttar isteri jónindegi Joǵarǵy komıssary Knýt Vollebek, EQYU-nyń Demokratııalyq ınstıtýttar men adam quqy jónindegi bıýrosynyń dırektory Iаnez Lenarchıch sııaqty bıik laýazymdy tulǵalardyń Qazaqstan týraly, Nazarbaev týraly, aldaǵy Astana sammıti týraly salmaqty pikirleri gazette birinen keıin biri, jedel jarııalandy. Ol deńgeıdegi adamdarmen kezdesý, suhbattasý ońaı emestigin bilesiz. Mundaı sharýalardy Syrtqy ister mınıstrligi basshylyǵynyń, sol elderdegi elshilerdiń kómegimen ǵana atqara alasyz. Úlken saıasat úshin mańyzdy ol suhbattardy Aqordanyń aıtýymen oryssha gazetter de jarııalady. Basylym bedeline bul da kerek.
– Segiz kúnde bes elde... Álemdi kóp aralaǵanyńyzdy bilemiz, ózimiz de kýámiz. Jalpy, uzyn sany qansha elde bolǵansyz?
– 59 elge taban tıipti.
– Buryn da osy shamada aıtqanyńyz esimde.
– Sodan beri ol san kóp óse qoıǵan joq. Negizgi elder qaıtalana beredi ǵoı. Áıtpese, shetke kóp shyǵýyn kóp shyqtyq. Bir AQSh-tyń ózine alty ret, bir Japonııanyń ózine bes ret, bir Fransııanyń ózine bes ret, bir Italııanyń ózine tórt ret jolym túsken eken, mysaly. Ondaı elder barshylyq. Gazette júrgen sońǵy alty-jeti jylda barǵan elderimniń tizimine qosylǵany tek eki el – Brazılııa men Indonezııa bolǵany esimde. Odan beride de solaı. Mysaly, ótken jyly jazda ulymyzǵa qonaqqa barǵanda Eýropanyń alty elin kólikpen aralap qaıttyq, al sonyń ishinde jańadan kórgenim Portýgalııa ǵana. Parlamentke kelgeli bergi úsh jarym jyldyń ishinde de biraz elge bardyq. Solardyń ishinde ózim buryn bolmaǵan el – bıyl kórgen Qatar ǵana. Keshe Májilis Tóraǵasy Nurlan Nyǵmatýlın bastaǵan parlamenttik delegasııanyń quramynda Vetnamnan oraldyq. Ol elde 2011 jyly Prezıdenttiń resmı sapary kezinde bolǵan edim. 59 el degen de az el emes qoı. Shúkir. Osynyń bári Táýelsizdiktiń arqasy. «Egemen Qazaqstannyń» arqasy.
Suhbat taqyrybyna oralaıyq. Osy janr boıynsha gazette júrgende tyndyrylǵan negizgi sharýa, árıne Elbasy Nursultan Nazarbaevpen 2011-2015 jyldar aralyǵynda jasalǵan suhbattar. Bul iske kiriskende Elbasymen áńgimeler ári ketse bir-eki jylda aıaqtalar dep oılaǵanmyn. Olaı bolmaı shyqty. Bul aradaǵy qıyndyq Elbasynyń suhbat berýge kelisimin alýdyń, tyǵyz jumys kestesine qosylýdyń uıymdastyrý máselelerin sheshýde ǵana emes. Negizgi qıyndyq – suhbatta qamtylatyn máselelerdiń mánine qanyǵý, sol boıynsha qoıýǵa bolatyn, qoıý qajet suraqtardy oılastyrý, áńgime barysynda týyndap qalatyn taqyryptardy qozǵaýǵa daıyn turý. Solaı ete alǵan sııaqtymyn. Nursultan Ábishuly 2015 jyly shyqqan «О́mir ótkelderi» atty suhbat kitabynyń alǵysózinde jýrnalıstik jumysymdy jaqsy baǵalady. Jalpy, óz basym Elbasynyń el úshin etken eńbegin kórsetýden aıanyp qalǵan emespin. Atyna mingesip, jarty álemdi sharlap shyqqanym, tórt qurlyqtyń (Aýstralııaǵa jolym bir túspeı-aq qoıdy) túkpir-túkpirinen kólemdi reportajdar joldaǵanym óz aldyna, san qyrly qyzmetine kóptegen pýblısıstıkalyq maqalalar arnadym. Tek Elbasy týraly jazǵandarymnyń basyn qossa da keminde eki tom quralyp qalar. Onyń syrtynda, Nursultan Ábishulynyń «Tańdamaly sózder» degen atpen jarııalanǵan qazaqsha toǵyz tomdyǵynyń arnaýly redaktory bolǵanym, sol toǵyz tomnyń aýdarmasyn uıymdastyrǵanym, ondaǵy ár sóılemge shuqshıyp, jeke-jeke salystyryp, qajet jerin túzep, jetildirip shyqqanym, talaı sózdi aýdarǵanym taǵy bar. Bul ózi bas-aıaǵy eki jylǵa sozylǵan aıta qalarlyqtaı aýyr jumys boldy. Jaýaptylyǵy tipti bólekshe.
«Ulttyq rýhtyń uly ustyndarynyń biri»
– Gazettiń toqsan jyldyǵynda, sol kezdegi opera jáne balet teatrynyń sahnasynda bastan-aıaq aýyzsha jasaǵan baıandamańyz eldiń esinde. Osyǵan qarap-aq basylymnyń sizdiń jan-júregińizge qanshalyqty jaqyndyǵyn bile berýge bolar edi. Bul gazettiń el ómirinde alar orny týraly ne aıtar edińiz?
– Dál sol kúni túske deıin redaksııaǵa Elbasymyz kelgen edi. «Egemenniń» jańa ǵımaratyn ózi saltanatty jaǵdaıda ashyp, jýrnalısterge keńinen tolǵap suhbat bergen edi. Memleket basshysynyń ujymǵa kelýi degen ońaı sharýa emes. Qat-qabat uıymdastyrý isterimen qapylyp júrip, teatrda jasaıtyn baıandamany tipti tezıs kúıinde qaǵazǵa túsirýge de shama bolmaǵany ras. Biraq gazet tarıhy da, basylymnyń abyroıyn asyrǵan ardaqty azamattar da kóńilde saırap turǵan soń emin-erkin áńgime túrinde baıandap shyqqanmyn. Onyń negizgi sebebi, jańa siz aıtqandaı, basylymnyń júrekke jaqyndyǵynda.
«Egemen Qazaqstan» – eldiktiń belgileriniń biri, ulttyq rýhanııattyń atrıbýttary qatarynda qasterlese bolatyndaı halyqtyq qazynamyz. Bul gazet – ulttyq rýhtyń uly ustyndarynyń biri. «Egemenimiz» barda egemendigimiz eńseli bolmaı qoımaıdy. Bıyl kóktemde Ulttyq akademııalyq kitaphanada gazettiń on tomdyq shejiresiniń alǵashqy bes tomdyǵy tanystyryldy. Sol basylymnyń ár betin ashyp qalsańyz tarıh tirilip, sóılep ala jóneledi. Jıyrmasynshy ǵasyrda eldiń basyna ne kelip, ne ketkeniniń, myna baıtaq dalada ne bolyp, ne ótkeniniń bári saırap tur. Bul júz jyldyń ishinde gazet eldiń jandy jylnamasyn jazyp shyqty. Bir ǵasyrdyń boıynda onyń aty san ret ózgerdi. Gazettiń aty ózgerse de, zaty ózgergen joq. Halyqtyń sózin sóıleıtin ulttyq basylym kúıinde qala berdi. Ár sózdiń sańylaýynan syǵalaıtyn senzýra zamanynda da halyqtyq sıpatyn, eldik minezin saqtaı aldy. Jaqynda Dıhan Qamzabekuly «Smaǵul jáne «Eńbekshi qazaq» atty maqalasynda: «Eńbekshi qazaq» resmı partııa men úkimettiń úni bolsa da is júzinde A.Baıtursynuly men Á.Bókeıhan shyǵarǵan «Qazaq» gazetimen rýhtas bop qaldy», dep baǵa beripti. Dál baǵa. Qanshalyqty qıynǵa tússe de gazet osyny jasaı alǵan. Bir ǵasyrdyń boıynda gazettiń shyǵatyn jeri de san ret ózgerdi: Orynbordan da shyqty, Qyzylordadan da shyqty, Almatydan da shyqty, Aqmoladan da shyqty. Qaıdan shyqqanda da oıdan shyqty. Táýelsizdik tańy atqanda elmen birge «Egemenniń» de baǵy jandy – erkin oıly basylymǵa aınaldy. Gazet búgin de óz bıiginde tur. О́zimiz senim kórsetken Darhan Qydyráli baýyrym el gazetiniń estafetasyn laıyqty ilip alyp ketti. Keshegi asyl aǵalarymyz salǵan sara joldy jaqsy jalǵastyryp jatyr.
– Gazettiń sizdiń óz ómirińizdegi ornyna qatysty ne aıta alasyz? 2003 jyly siz Aqparat mınıstri qyzmetine taǵaıyndaldyńyz. Sonda ujymmen qoshtasarda siz: «Eger qalam ustaǵan adam «Egemen Qazaqstandy» basqarǵan soń basqa bir jumysqa joǵaryladym dep sanasa, qatelesedi. О́ıtkeni qalam ustaǵan adam úshin «Egemendi» basqarýdan bıik beles bolmaýǵa tıis», dedińiz.
– Qazir de solaı sanaımyn. Mundaı gazette jumys isteý – abyroı, ony basqarý – basqa qonatyn baq, al uzaq jyldar boıy basqarý – sırek qonatyn baq. Al maǵan bas gazetti attaı on alty jyl basqarý baǵy buıyrdy. Osy suhbatqa ishteı daıyndalǵanda toqsan jyldyqqa shyǵarǵan «Bas basylym» degen kitap-albomǵa jazylǵan alǵysózdi qaıta oqydym. Mine, myna bir tusyn kóshirip te alǵanmyn: «Qazaqtyń sózin ustaǵan nebir jaqsy men jaısańnyń qasıetti jolyn jalǵastyrý baqyty buıyrǵan taǵdyryma táýbe deımin, halqymyzdyń bas gazetiniń tizginin tapsyrǵan Elbasyna sheksiz alǵysymdy bildiremin», degen ekenmin. Sol sózimdi taǵy da yqylaspen qaıtalaımyn.
«Alty ese arttyrý – aıtýǵa ǵana ońaı»
– Bizge redaksııalyq lezdemede aıtatyn bir sózińizdi gazet arqyly oqyrmandarǵa da jetkizsem deımin. «Egemenniń» bir ereksheligi mynada: ózge gazettegi maqala sony jazǵan avtordyń sózi bolyp qaralady, al «Egemendegi» maqala sony jarııalaǵan gazettiń sózi bolyp qaralady deýshi edińiz ǵoı.
– Eldiń «Egemenniń» sózine senetin qalpyn, ondaǵy sózdi kóptiń ortaq oıy sanaıtyn sıpatyn saqtap qalýǵa tyrysý óte mańyzdy.
Biz gazettiń mártebesi ózgerip, Úkimettiń quryltaıshylyǵynan aıyrylyp, qatardaǵy aksıonerlik qoǵamǵa aınalyp qalǵan alǵashqy kúnderden osyny qatty qamdadyq. San túrli sebepterge baılanysty basylymnyń taralymy 38 myń danaǵa deıin quldyrap ketkenine alańdadyq. Ári oılap, beri oılap, aqyry basylymnyń halyqtyq sıpatyn qaıta qalyptaýdyń basty joly gazettiń negizgi avtory halyqtyń ózi bolýy degen toqtamǵa keldik. О́mirdiń san salasynan aıtary bar, qalamynyń jeli bar adamdardy izdeýge kiristik, talaı jyldan beri gazetten qol úzip qalǵan qalamgerlerdi avtorlyqqa qaıtadan tarta bastadyq. Taqyryptyq, toqsandyq josparlar jasalatyn boldy. Ár bólim aldaǵy kezde qandaı máselelerdi qaýzaıtynyn, olardy redaksııa jýrnalısi nemese tıisti avtor qaı kezge deıin zerttep shyǵýǵa, jazyp bitýge tıis ekenin bilip otyrdy. Nátıje kóp kúttirgen joq. Endi jazatyn jurt «Egemende» maqala jarııalaýdy abyroı sanaıtyn boldy. Maqala degen aǵylyp túse bastady. Tańdaýǵa, kóńil tolmaǵan dúnıeni qaıtarýǵa nemese jetildirýdi talap etýge múmkindik ashyldy. Eldiń beti «Egemenge» buryldy. «El gazeti» degen jańa aty birte-birte ornyǵa bastady. Alǵashqy bir jyldyń ózinde gazet taralymy bir jarym esege artyp shyǵa keldi. Eńbek baǵalandy. Elbasy Nursultan Nazarbaev 2002 jylǵy 12 naýryzda ótken Qazaqstan jýrnalısteriniń I kongresinde sóılegen sózinde: «Jýrnalısterdiń óziniń qulshynysy men biliktiligi bolmasa, memleket tarapynan atqarylǵan eshqandaı shara pármendi bolyp shyqpaıdy. Mysaly, «Egemen Qazaqstan» gazeti bir jyldyń ózinde ǵana basylymnyń taralymyn 27 myń danaǵa arttyra aldy ǵoı. Mine, qoldaýdy osyndaı buqaralyq aqparat quraldaryna kórsetý kerek», dep qadap aıtty. Bul sóz bizge úlken demeý boldy. Endigi jerde baspasózge jazylym naýqanyn júrgizýdegi sózimizdi de ótimdirek etýge aınaldy... Sóıtip taralym jyldan-jylǵa óse berdi, óse berdi. Aqyry biz gazettiń taralymyn 38 myńnan 212 myńǵa apardyq. Alty ese arttyrý – aıtýǵa ǵana ońaı. Bul qyrýar qarekettiń, jumylǵan jumystyń jemisi.
Aıyp etpeńiz, taǵy bir jaǵdaıdy aıtyp qalǵym keledi. Muny óz basym shyn maqtanysh etemin. Elbasynyń qamqorlyǵynyń arqasynda biz redaksııa qyzmetkerleriniń turmys jaǵdaıyn da jaqsylap jóndeı aldyq. Segiz qabattyq sáýletti ǵımarat saldyrdyq. Eki kóp páterli úı, eki jataqhana turǵyzdyq. 2016 jyldyń basynda «Egemen Qazaqstanda» baspanasyz birde-bir qyzmetker qalmaǵan edi. Osyndaı-osyndaı saýapty isterdi oılaǵanda súıikti gazetimniń ǵasyrlyq torqaly toıynyń qýanyshy jan-júregimdi jibitip jiberetinin nesine jasyraıyn. О́z ómirimdegi eń bir mereıli sátterdiń talaıy osy gazetpen baılanysty. Jıyrmanyń bel ortasyna da jetpegen shaqta tabaldyryǵynan attaǵan redaksııanyń esiginen kirip, tórine deıin jettim. Tilshisi de boldym, bólim meńgerýshisi de boldym, redaksııalyq alqa múshesi de boldym, bastaýysh jýrnalıster uıymynyń jetekshisi de boldym, kásipodaq uıymynyń tóraǵasy da boldym, bastaýysh partııa uıymynyń hatshysy da boldym, osy jerden partııanyń Ortalyq komıtetine qyzmetke shaqyrylyp, onyń baspasóz sektorynda gazettiń kýratory da boldym. Talaı jyl apparatta, Mádenıet mınıstrliginde, Teleradıokorporasııada jumys istep kelip, 2000 jyly jańadan qurylǵan aksıonerlik qoǵamnyń prezıdenttigine bekitildim. Osy jerden 2016 jyly Májiliske aýystym. «Egemende» júrip, jýrnalıstik kásiptiń qyr-syryna qanyqtyq, oı ustadyq, til ushtadyq, kúndiz árip túzetip, túnde qarip kúzetip, aýyr jumysta shyńdaldyq, eldik istiń jaýapkershiligin sergek sezindik. Azamattyqtyń úlken mektebinen óttik. Abyroıyn da ıelendik. Mınıstr atansam da, depýtattyqqa saılansam da aldymen «Egemendegi» jankeshti eńbektiń eskerilýi ekenin jaqsy bilemin. Ana bir jyldary baspasózge jazylý naýqanynda qoıatyn aıdarymyz bolýshy edi – «El gazeti «Egemen», jazylmaıyn nege men?» deıtin. Sony sál ózgertip aıtyp, «Azamat etken «Egemen», ardaqtamaıyn nege men?» desem, artyq sózge balamassyz. Dál qazir, baspasózge jazylym qyzý júrip jatqanda myna jaıdyń basyn ashyp aıtaıyn: «Egemen» – eldiktiń eren minberi. Bul gazetti jazdyryp aldyryp, júıeli oqý arqyly siz elmen birge tynystaısyz, elshil adam, memleketshil tulǵa retinde qalyptasasyz.
«Egemen Qazaqstannyń» júz jyldyǵy – eldigimizdiń bıik bir belesi, qazaq rýhanııatynyń mereıli merekesi, ulttyq jýrnalıstıkanyń ortaq toıy. Toıymyz tarqamasyn!
– Sizge de bar jetistikti tileımiz. Jaqsylyǵyńyzdy umytpaımyz, aǵa!
Áńgimelesken
Qarashash TOQSANBAI,
«Egemen Qazaqstan»