Bolıvııa prezıdenti Evo Morales eldegi toqtaýsyz kóterilis nátıjesinde qyzmetinen ketip, Meksıkada boı tasalap júr. Al bılik Senattaǵy oppozısııalyq toptyń qolyna ótti. Evo Morales bul jaǵdaıdy tóńkerispen teńestirip otyr.
Eldegi narazylyq bıylǵy prezıdent saılaýynan keıin órshigen edi. 20 qazanda bastalǵan mıtıngilerdiń áli kúnge deıin núktesi qoıylmaı tur. Evo Morales buǵan deıin de úsh ret saılaýǵa túsken. 2005, 2009, 2014 jyldary Prezıdent bolyp saılanǵan edi. Al bıylǵy 20 qazanda ótken saılaýda 47,1 paıyz nátıjemen qarsylasy Karlos Mesany 10,6 úlesimen artta qaldyrdy. Al halyq bolsa saılaýdyń ádil ótkenine kúmándanyp, narazylyq tanytty. 31 qazanda jaǵdaı ýshyǵa tústi. Beıbit sherýler qaqtyǵysqa ulasyp, Santa-Krýs provınsııasynda eki adam qaza tapsa, alty adam jaralandy. Al qarashada memlekettiń quqyq qorǵaý organdary narazylardyń qataryn tolyqtyrǵany habarlandy. Saılaý nátıjesiniń kúmándi bolýyna jaýaptardyń eki kúnnen soń jarııalanýy sebep. Saılaý ortalyǵy alǵashqy kúni daýystyń 80 paıyzyn sanap, odan keıin aqparat berýdi toqtatqan. Bul aıyppen Amerıka memleketteriniń uıymy da kelisip otyr. Olar tipti arnaıy aýdıt jasap, saılaý nátıjesiniń jalǵan ekenin dáleldep úlgergen.
О́tken jeksenbide memlekettiń qarýly kúshter qolbasshysy Ýılıamı Kalıman Moralesti qyzmetinen óz erkimen ketýge shaqyrdy. Sonymen qatar qarýly qaqtyǵystarǵa toqtaý salatynyna sóz berdi. Al bul usynystan keıin Barselona ýnıversıtetiniń professory Pýmpeý Fabra memlekette tóńkeris boldy deýge tolyq negiz bar degen oıyn aıtty. Bul oımen Kýba, Venesýela, Argentına men Nıkaragýa memleketteri de kelisip otyr. Tipti ony qoldaýshylar da tabyla ketti. Venesýela prezıdenti Nıkolas Madýro Twitter jelisindegi paraqshasynda Moraleske «baýyrym» dep til qatyp, Bolıvııanyń negizgi halqy násilshildiktiń qurbany bolyp otyrǵanyn jazǵan. Kýba kóshbasshysy Mıgal Dıas-Kanel memlekettegi ońshyldardy aıyptap, prezıdentti ornynan alý Bolıvııadaǵy demokratııaǵa qarsy áreket ekenin aıtady.
Kóp uzamaı Meksıkanyń Moraleske pana berýge keliskeni belgili boldy. Bul habardy Meksıka Syrtqy ister mınıstri Marselo Ebrard rastap otyr. Onyń aıtýynsha, bul ótinishti Evr Moralestiń ózi bildirgen.
Qazirgi kezde Bolıvııada saıası vakýým paıda bolǵan. О́ıtkeni memleket zańyna saı prezıdent qyzmetinen ketse, bılik vıse-prezıdenttiń ne senat tóraǵasynyń qolyna ótedi. Degenmen Bolıvııa vıse-prezıdenti Alvaro Garsııa Lınera da memleketten ketetinin málimdegen edi. Bul sheshimdi senat tóraǵasy Adrıana Salvaterra da qoldady. Osylaısha, memleket saıası kóshbasshylarynan bir-aq kúnde aıyryldy. Degenmen álem sarapshylary Moralestiń ońaı jeńile salǵanyna senbeıdi.
Eýropa odaǵy sekildi halyqaralyq uıymdar Evo Moraleske qoldaý bildire qoıǵan joq. Brazılııa, Kolýmbııa, Perý, Gvatemala, AQSh, Kanada elderi tez arada kezekten tys saılaý uıymdastyryp, jaǵdaıdy retteýdi usyndy.