Úkimettiń selektorlyq otyrysynda Qaraǵandy oblysynda mindetti áleýmettik medısınalyq saqtandyrýdy (MÁMS) engizý boıynsha qanatqaqty jobanyń iske asyrylý qorytyndylary qaraldy. Bul týraly primeminister.kz habarlady.
QR densaýlyq saqtaý mınıstri E. Birtanov, Qaraǵandy oblysynyń ákimi J. Qasymbek, «Mindetti áleýmettik medısınalyq saqtandyrý qory» KEAQ basqarma tóraǵasy A. Jumaǵulov baıandama jasady.
Osy jyldyń 1 qyrkúıeginen bastap Qaraǵandy oblysynda pılottyq joba iske asyrylýda, ol MÁMS júıesin aprobasııalaýǵa jáne ony Qazaqstanda tolyq kólemde engizýge daıyndalýǵa múmkindik berdi. О́ńirde eki aıda turǵyndardy medısınalyq saqtandyrý (192%-ǵa) esebinen ońaltý kómegi (42,2%-ǵa) jáne qymbat zertteýlermen (KT jáne MRT) qamtý kólemi artty.
Tegin medısınalyq kómektiń kepildik berilgen kóleminiń (TMKKK) jańa modeli jáne MÁMS paketi 2020 jyldyń 1 qańtarynan bastap úsh deńgeıli medısınalyq qamsyzdandyrý júıesin engizýdi qarastyrady.
Birinshi deńgeı — TMKKK jańa modeli memleket mindettemeleriniń naqty shekterin anyqtaıdy jáne halyqty bazalyq medısınalyq qyzmettermen jalpylama qamtý boıynsha jalpyǵa birdeı tanylǵan halyqaralyq standartty júzege asyrady.
Ekinshi deńgeı — saqtandyrylǵan turǵyndarǵa arnalǵan MÁMS paketi, bul TMKKK tys medısınalyq kómektiń qoljetimdiligin qamtamasyz etedi.
Úshinshi deńgeı — bul TMKKK jáne MÁMS paketterine kirmeıtin medısınalyq qyzmetter. Olar aqyly túrde nemese erikti medısınalyq saqtandyrý esebinen qamtamasyz etiledi.
Memleket halyqty alǵashqy medısınalyq-sanıtarlyq kómek deńgeıinde bazalyq medısınalyq qyzmetterdiń qajetti paketimen (profılaktıkalyq egýler men medısınalyq tekserýler, patronaj, júktilik kezinde qaraý jáne t.b.) jáne jedel jáne shuǵyl kómekke qoljetimdilikpen qamtamasyz etýdi jalǵastyrýda.
MÁMS engizýdi eskere otyryp, jalpy alǵanda 2020 jyly densaýlyq saqtaý salasyna arnalǵan bıýdjet elimiz boıynsha shamamen 1,5 trln teńgeni quraıdy, onyń ishinde MÁMS esebinen 500 mlrd teńgeden astam qarajat. Medısınalyq ońaltýdy qosa alǵanda, halyqtyń qajettilikterine negizdelgen medısınalyq kómektiń basym túrlerin qarjylandyrý edáýir artady, ol kelesi jyly 7 esege jáne 2025 jylǵa qaraı 11 esege deıin ulǵaıady. Kelesi jyly medısına qyzmetkerleriniń jalaqysy dárigerlerge 30%-ǵa jáne orta medısına qyzmetkerine 20%-ǵa, al 2025 jylǵa qaraı olar qazirgi jalaqymen salystyrǵanda 2 ese ósedi.
«Elbasy N. Nazarbaev mindetti áleýmettik medısınalyq saqtandyrýǵa kóshýge tolyq daıyndyqty qamtamasyz etý mindetin qoıdy. Memleket basshysy Q. Toqaev óz Joldaýynda áleýmettik medısınalyq saqtandyrýdy iske asyrý máselesine úlken jaýapkershilikpen qaraý qajettigin eskertti. Onymen barlyq qazaqstandyq qamtylýy tıis. Ol úshin barlyq deńgeıdegi medısınalyq mekemeler qajetti aqparattyq júıelerge qosylýy kerek. Árbir azamattyń derekteri jańartylýy tıis», — dedi A. Mamın.
Premer-Mınıstr MÁMS engizý boıynsha pılottyq jobanyń nátıjesin oń baǵalap, Qaraǵandy oblysynyń bul tájirıbesin basqa óńirler de eskerýi qajet ekenin aıtty.
Úkimet basshysy osy jyldyń sońyna deıin medısınalyq uıymdardyń MÁMS iske qosýǵa tolyq daıyndyǵyn qamtamasyz etýdi, turǵyndar týraly derekterdiń tolyq jańartylýyn aıaqtaýdy jáne balalar, stýdentter men úsh jasqa deıingi balalardy tárbıelep otyrǵan, jumyssyz azamattar boıynsha aqparattyq júıelerdegi derekterdiń dáldigin qamtamasyz etýdi tapsyrdy.