27 qarashada Qazaqstan Prezıdenti Qasym-Jomart Toqaev Qyrǵyzstan Prezıdenti Sooronbaı Jeenbekovtiń shaqyrýymen Qyrǵyzstanǵa memlekettik saparmen barady. Bul týraly Prezıdenttiń baspasóz hatshysy Berik Ýálı Facebook paraqshasynda jazdy.
«Kelissózder barysynda eki el basshylary Qazaqstan men Qyrǵyzstan arasyndaǵy strategııalyq seriktestiktiń qazirgi ahýaly men perspektıvalaryn talqylaıdy jáne kezdesý qorytyndysy boıynsha birqatar ekijaqty qujatqa qol qoıady dep josparlanýda» dep jazdy Berik Ýálı.
Sondaı-aq 28 qarashada Memleket basshysy Bishkek qalasynda ótetin Ujymdyq qaýipsizdik shart uıymy (UQShU) Qaýipsizdik keńesiniń sessııasyna qatysady.
«Is-sharalardyń kún tártibinde Uıym jumysy aıasyndaǵy ózara is-qımyldarǵa qatysty kóptegen másele qarastyrylyp, UQShU-nyń bıyl atqarǵan jumystary boıynsha basym baǵyttardyń júzege asyrylýy qorytyndylanady dep josparlanǵan» dep jazdy ol.