Almatyǵa memlekettik qyzmetkerler áleýetin – olardyń bilimi men biligin, paıymdaý jáne kóshbasshylyq qabiletterin arttyrý máselelerin talqylaýǵa onnan astam memleket ókilderi jınaldy. Qarashanyń 27-si men 29-y aralyǵynda memlekettik basqarý oqý oryndary men ınstıtýttaryn 2030 deıingi turaqty damý boıynsha BUU Kún tártibi baǵytynda nyǵaıtý jóninde semınar ótýde.
Qatysýshylarǵa Astana memlekettik qyzmet haby basqarýshy komıtet tóraǵasy Álıhan Baımenov, BUU Damý baǵdarlamasynyń Qazaqstandaǵy Turaqty ókili Iаkýp Berısh, BUU Ekonomıkalyq jáne áleýmettik máseleler boıynsha departamentiniń memlekettik basqarý máseleleri boıynsha aǵa qyzmetkeri Garegın Manýkıan, Almatydaǵy Syrtqy ister mınıstrligi ókildigi basshysy Erlan Ysqaqov, sondaı-aq Prezıdent janyndaǵy Memlekettik basqarý akademııasy vıse-rektory Aıgúl Kósherbaeva jyly lebizderin bildirdi.
Baımenov myrza turaqty damý maqsattaryna (TDM) qol jetkizý úshin sapaly memlekettik basqarýdyń mańyzyna toqtaldy. «Memlekettik basqarý sapasy, óz kezeginde, kóbine bilim berý mekemeleri men memlekettik basqarý ınstıttary aınalysatyn kadrlar daıyndaý sapasymen anyqtalady. Bul aspektiler qazirgideı VUCA álemde árbir eldiń damý basymdylyqtaryna jetý jolynda ózekti bola túsýde», dedi spıker.
BUU Damý baǵdarlamasynyń Qazaqstandaǵy Turaqty ókili Iаkýp Berısh memlekettik qyzmetti damytý maqsatynda kóptegen eldiń úkimetterine ozyq, zamanaýı tásildermen tanysýǵa, tıimdi oqytý baǵdarlamasyn daıarlaýda qoldaý kórsetetinderin jetkizdi. «BUU Damý baǵdarlamasy Qazaqstanda memlekettik qyzmet reformasyna, onyń ishinde memlekettik qyzmetkerler áleýetin arttyrýǵa qoldaý kórsetýde. Memlekettik qurylymdarǵa Astana memlekettik qyzmet habymen birge jańa, belsendi, ınnovasııalyq mehanızmder qoldanýda qolǵabys jasaımyz. Sondaı-aq Qazaqstannyń memlekettik qyzmet agenttigine memlekettik qyzmetkerlerdiń biryńǵaı quzyretter sheńberin jáne eńbekaqy júıesin ázirleýde qoldaý kórsetemiz. Astana haby óz mıssııasyn júzege asyrýda memlekettik qyzmetkerler áleýetin arttyrý máselesine únemi, júıeli túrde kóńil bóletindigi qýantady», dedi Qazaqstandaǵy BUU DB Turaqty ókili.
Bul jıynnyń ortaq maqsaty – turaqty damý maqsattaryn júzege asyrýdy qoldaýda memlekettik qyzmetkerler áleýetin arttyrý, memlekettik basqarý ınstıtýttary damýy jaıly aqparat almasý.
Semınarǵa qatysýshylar memlekettik basqarý oqý oryndarynyń ózekti máselelerin, olardyń transformasııalanýy joly men ınnovasııalyq kóshbasshylyǵy jaıyndy oı bólisti. Al memlekettik basqarý salasyndaǵy ozyq tájirıbemen Nıderlandy, AQSh, BAÁ jáne basqa elderden kelgen sarapshylar pikir almasty.
Shara barysynda alty elden – Qazaqstan, Qyrǵyzstan, Tájikstan, Túrikmenstan, О́zbekstan jáne Aýǵanstannan – turaqty damý maqsattary boıynsha úılestirýshiler, ýákiletti organ ókilderi men memlekettik basqarý boıynsha sarapshylar memlekettik ınstıtýttardy damytý men qurylymdyq ózgerister jasaý joldary, memlekettik qyzmetkerlerdiń kásibı biliktiligin arttyrý máselelerin qarastyrdy. Bul alań jan-jaqty pikir almasýǵa, ınnovasııalyq ıdeıalardy jetkizýge jáne jańa áriptestikke jol ashady.
Semınar barysynda qonaqtar Halyqqa qyzmet kórsetý ortalyǵy jumysymen jáne «Azamattarǵa arnalǵan úkimet» memlekettik korporasııasynyń prezentasııasymen tanysady.
Semınardy Astana memlekettik qyzmet haby BUU Ekonomıka jáne áleýmettik máseleler boıynsha departamenti, BUU Damý baǵdarlamasy uıymdastyryp, Prezıdent janyndaǵy Memlekettik basqarý akademııasy jáne «Azamattarǵa arnalǵan úkimet» memlekettik korporasııasy qoldaýymen ótýde.
Semınar úzilisi kezinde Astana memlekettik qyzmet haby basqarýshy komıtet tóraǵasy Álıhan Baımenov ótip jatqan shara jóninde jýrnalısterge bylaı túıindedi:
«BUU Bas Assambleıasy bekitken adamzattyń Turaqty damý maqsattary aıasynda memlekettik basqarýdyń sapasy óte mańyzdy ról atqarady. Sebebi 17 maqsattyń bárin úılestirýshi ulttyq úkimetter bolsa, sol ulttyq úkimetterdiń jumys sapasy bul memlekettik qyzmetshilerdiń biliktiligimen de anyqtalady. Osy turǵydan alǵanda jalpy osy adamzattyń 2030 jylǵa deıin belgilengen mejelerine jetý úshin, biz memlekettik qyzmetshilerdiń de biliktiligin kóterip, olarǵa osy atalǵan maqsattardyń bir-birimen baılanysyn túsindirýimiz qajet. Adamzattyń ortaq maqsattaryna jetý úshin barlyq úkimetter birlesip jumys jasaý qajet ekenin túsinýimiz kerek. Bul turǵydan alǵanda memlekettik qyzmetshilerdiń biliktiligin jetildirip, olardy daıyndaıtyn memlekettik basqarý akademııalary, ınstıtýttardaǵy ustazdar, ujymdar osy Turaqty damý maqsattaryn tereńirek túsinip, memlekettik qyzmetshilerge qandaı jańa bilim berý kerektigin talqylaý qajet».