Búginde qoǵamda mal urlyǵy árbir sharýanyń mazasyn alǵan máselege aınalyp otyr. Qys mezgili kelip, soǵym ýaqyty taıaǵanda mal urlyǵynyń tipti jıilep ketetini de ras. Al sol mal urlyǵynyń óńirlerde ashylý kórsetkishi qandaı degen másele de bar. Sonymen qatar adamdardy eńbekke zańsyz jegý sııaqty máseleler de kún tártibinde óte ózekti. Iаǵnı el arasynda keıbir sharýalardyń sheteldik azamattarǵa malyn baqtyryp qoıý áreketi de tolastamaı otyr.
Jambyl oblystyq polısııa departamenti mal urlyǵynyń aldyn alý jáne jaǵdaıdy jedel jaqsartý maqsatynda óńir boıynsha «Qashar» is-sharasyn uıymdastyrǵan bolatyn. Is-shara barysynda oblys aýmaǵyndaǵy 731 mal sharýashylyǵy qaralǵan edi. Departamenttiń málimeti boıynsha, jedel aldyn alý sharasynyń nátıjesinde mal sharýashylyqtaryna qarasty 19 adamnyń turaqty turǵylyqty jeriniń joq ekeni anyqtalǵan. Al tekserilgen myńǵa jýyq qarý ıeleriniń 63-i qarý saqtaý erejelerin buzǵany úshin jaýapqa tartylyp, 49 atys qarýy tárkilengen. Sonymen qatar belgi salynbaǵan 39 bas mal anyqtalyp, urlanǵan 100 bas maldyń tabylýy da mal urlyǵynyń údeı túskenin kórsetse kerek. Sondaı-aq «Qashar» is-sharasy kezinde polısııa qyzmetkerleri izdeýde júrgen eki qylmyskerdi ustady.
Sonymen qatar kóshi-qon zańnamasyn buzýdy anyqtaý úshin de Jambyl oblysynyń aýmaǵynda uıymdastyrylǵan «Qashar» jedel aldyn alý óz nátıjesin berdi. Oǵan Jambyl oblystyq polısııa departamenti kóshi-qon qyzmeti basqarmasy qyzmetkerleriniń jeke quramy qatysqan bolatyn. Baızaq aýdanynyń Tegistik aýylyndaǵy jeke sharýashylyqty tekserý barysynda zańsyz kóshi-qonǵa qarsy kúres jónindegi arnaıy jeke rota qyzmetkerleri zańsyz eńbek qyzmetimen aınalysatyn О́zbekstan Respýblıkasynyń tórt azamatyn anyqtaǵan. Qazir sheteldik azamattarǵa qatysty Ákimshilik-quqyq buzýshylyq kodeksiniń 517-baby boıynsha ákimshilik hattama toltyrylyp, olardy el aýmaǵynan shyǵaryp jiberý máselesi sheshilýde.
Oblystyq polısııa departamentiniń málimeti boıynsha, bıyl mal urlyǵynyń 185 deregi tirkelip, onyń 144-i ashylǵan. «Qylmystardyń ashylý kórsetkishi byltyr 53,2 paıyz bolsa, osy jyly 70,2 paıyzdy qurap otyr. Salystyra qaraǵanda ashylý kórsetkishi bıyl 17 paıyzǵa artqan. Bul óz kezeginde polısııa qyzmetkerlerimen júrgizilip jatqan aldyn alý sharalarynyń nátıjesi bolyp tabylady», deıdi oblystyq polısııa departamenti baspasóz qyzmetiniń jetekshisi Gúlsara Muhtarqulova.
Jambyl oblysy