Nur-Sultan qalasynda «Tehnologııalardy kommersııalandyrý – ǵylym men bıznesti biriktirýdiń quraly» atty forým ótti. Forýmǵa 300-den astam adam qatysyp, ǵylymdy damytýdyń jáne ekonomıkanyń naqty sektoryna otandyq ázirlemelerdi engizýdiń ózekti máselelerin, sondaı-aq ǵylym men bıznestiń ózara is-qımylyn is júzinde júzege asyrý máselelerin talqylady.
Úshinshi halyqaralyq forýmǵa Parlament Senaty men Májilisiniń depýtattary jáne «Atameken» UKP basshylyǵynyń ókilderi qatysty.
«Halyqaralyq forýmdy ótkizýdiń negizgi maqsaty – otandyq jańa tehnologııalardy kommersııalandyrýdy damytý jáne ǵylymı ázirlemelerdi dáripteý. Forýmnyń baǵdarlamasyna jobalardyń keńeıtilgen sessııalary men tehnologııalyq kásipkerlik boıynsha semınarlar ótkizý, ınnovasııalyq jobalardy damytý, ǵylymı zertteýlerdi kommersııalandyrý jáne bastaýshy kompanııalardy damytýdy qoldaý quraldary kiredi. Ǵylymı jobalardy kommersııalandyrýǵa arnalǵan jobalar kórmesi, pikirtalas alańdary, sondaı-aq kezdesýler men beıresmı qarym-qatynas enedi. Mundaı format qazaqstandyq ǵylym men múddeli bıznes qurylymdar arasyndaǵy yntymaqtastyqqa jol ashady», deıdi uıymdastyrýshylar.
Sondaı-aq jıyn barysynda «QazTechVentures» AQ, «Damý» kásipkerlikti damytý qory, «QazIndustriya» qazaqstandyq ındýstrııa jáne eksport ortalyǵy, Halyqaralyq jasyl tehnologııalar men ınvestısııalyq jobalar ortalyǵy arqyly ótetin ınnovasııalyq jobalardy qoldaýdyń sharalary sóz boldy.
Aıta ketetin taǵy bir jaıt, forým sheńberinde jas ǵalymdardyń «Bolashaq Start up» atty startap-jobalarynyń baıqaýy ótti. Oǵan 17 komanda qatysyp, baıqaý aıasynda trek-sessııalar, sondaı-aq ınvestorlar men startaptardyń ózara «jyldam tanysý» sessııasy ótkizildi. Eń tartymdy jobalarǵa ıe qatysýshylar ınvestorlardan qarjylyq qoldaý alady.
«Búgingi forým – ǵylym men bıznes ókilderi úshin dıalog qurý alańy. Osy jerde ǵalymdar ózderiniń ǵylymı ázirlemelerin áleýetti bıznes serikteske kórsetý múmkindigine ıe. Búgingi tańda «Ǵylym qory» AQ-ǵa jalpy somasy 17,8 mlrd teńgeni quraıtyn 158 joba kirip otyr. Ǵylymı ónertabystary arqyly 450-den astam ǵalym bıznesterin júzege asyrýda. Sonymen birge ınnovasııalyq ónimdi satýdan túsken jalpy kiris 3,7 mlrd teńgeni quraıdy. Eksport kólemi – 13,8 mln teńgege jetse, jyl saıynǵy salyq aýdarymdarynyń kólemi 2 mlrd teńgeden asady. Bul bizdiń elimizdegi ǵylymı ázirlemelerdi kommersııalandyrýdaǵy úlken jetistikter», dedi «Ǵylym qory» AQ basqarma tóraǵasy Aryn Orsarıev.