Prezıdent Qasym-Jomart Toqaev jemqorlyqtyń ulttyq qaýipsizdik pen memlekettiń bolashaǵyna nuqsan keltiretinin atap ótip, bul dertpen bir jeńnen qol, bir jaǵadan bas shyǵaryp, birlesip kúresýge shaqyrdy.
Azamattarda sybaılas jemqorlyqqa qarsy mádenıet pen berik ımmýnıtetti qalyptastyrmaıynsha, oń nátıjege qol jetkizý múmkin emes. Eń áýeli sybaılas jemqorlyqtyń saldarymen kúresý emes, onyń aldyn alýdyń jolyn árbir qazaqstandyq óz otbasynda dáriptese, qoǵam dertine qarsy ımmýnıtetti de nyqtaǵan bolar edik.
Qazaqta «uıada ne kórseń, ushqanda sony ilersiń» demekshi, bala ata-anasynyń boıynan qandaı qasıetter kórse, solardy boıyna sińiretin bolady.
Otbasy ósip kele jatqan urpaqtardyń áleýmettenýin, sybaılas jemqorlyqqa qarsy kúres júıeli negizge qoıylǵan qoǵamnyń jańa múshelerin daıyndaýdy qamtamasyz etedi.
Bul rette Sybaılas jemqorlyqqa qarsy is-qımyl agenttigine erekshe keshendi quzyret berilgen.
Agenttiktiń barlyq bastamalary senim, ádildik, parasattylyq qundylyqtar prızmasy arqyly júzege asyrylýda. Parasattylyq ıdeologııasy sybaılas jemqorlyqqa qarsy kúresti kúsheıtýdiń tujyrymdamalyq negizi bolyp aıqyndalǵan.
Parasattylyq qoǵam múddesiniń basymdyǵyna baǵyttalǵan qazirgi zamanǵy memlekettik basqarýdyń barlyq júıesiniń irgetasy sanalady.
Qazirgi tańda agenttiktiń Shymkent qalasy boıynsha departamenti barlyq top arasynda parasattylyq mádenıetin jetildirý maqsatynda túrli formattaǵy is-sharalar uıymdastyrýda. Ásirese Jastar jylyna oraı jastarǵa kóptep kóńil bólinýde. «Balany eń áýeli meıir-shapaǵatqa, odan soń aqyl-parasatqa, aqyrynda naǵyz paıdaly ǵylymǵa, eńbekke baýly» dep uly Abaı aıtqan bolatyn.
Bilim salasyndaǵy sybaılas jemqorlyqty joıý jáne ol iske jastardy belsendi jumyldyrý maqsatynda joǵary oqý oryndary men kolledjderde «Sanaly Urpaq», al mektepterde «Adal urpaq» jobalary júzege asyrylýda.
Qazaqtyń halyq jazýshysy Ǵ.Músirepov «Adaldyq: ózi aldansa aldanar, ózi eshkimdi aldamas» dep atap ótken. Osy oraıda qalamyzda oqýshylar men stýdentterdi ózderin tárbıeleýge múmkindik beretin, ózgeni aldamaýǵa úıretetin «Adaldyq dúkenderi» iske qosylǵan. Iаǵnı, munda oqytýshylar men stýdentter ózderine qajet zattardy alyp, onyń aqshasyn kassalyq jáshikke qaldyrady. Osylaısha satýshysy joq dúkende ózderine ózderi qyzmet kórsetedi.
Qaıyrymdylyq – qadirli is demekshi, jaqynda agenttik bastamasymen Shymkentte kómekke muqtaj jandarǵa qolushyn sozý jáne jas urpaqty jaqsylyq jasaýǵa úndeý maqsatynda «Izgilik elshisi» jobasy qolǵa alyndy. Atalǵan joba aıasynda departament pen «Shymkent – adaldyq alańy» jobalyq keńsesiniń ókilderi jáne jastar kómekke muqtaj jandarǵa jan-jaqty volonterlik kómek kórsetedi.
Sondaı-aq qoǵamda parasattylyq qaǵıdatyn keńinen jetkizý, sybaılas jemqorlyqtyń aldyn alý maqsatynda túrli sala ókilderimen kezdesip, túsindirý jumystaryn júrgizý maqsatynda «Shymkent – adaldyq alańy» jobalyq keńsesi janynan «Parasattylyq mektebi» jumysyn bastap, onda 50 lektor arnaıy oqýdan ótti. Atalǵan lektorlar qazirgi tańda qala mektepterinde túsindirý jumystaryn júrgizýde.
Memleket basshysy Qazaqstan halqyna Joldaýynda azamattardyń barlyq syndarly ótinish-tilekterin jedel ári tıimdi qarastyratyn «Halyq únine qulaq asatyn memleket» tujyrymdamasyn iske asyrýdy tapsyrǵan bolatyn. Osyǵan baılanysty departament memlekettik mekemelermen birlesip, «Open Space» formatyna kóshirý jáne basshylardyń kabınetterin ákimshilik ǵımarattardyń birinshi qabattaryna aýystyrý, memlekettik organdardyń ashyqtyǵyn qamtamasyz etý maqsatynda jumystar júrgizýde. Qazirgi kezde memlekettik organdardyń ashyqtyǵyn qamtamasyz etý jáne halyqqa qyzmet kórsetý servısin zamanaýı talaptarǵa saı júzege asyrý maqsatynda front-ofıster ashylýda. Tipti bilim berý jáne densaýlyq saqtaý uıymdary da biraýyzdan qoldap, azamattardy qabyldaý oryndaryn «Open Space» formatyna aýystyryp, ózderi halyqqa jaqyn bolý maqsatynda kabınetterin birinshi qabatqa aýystyrýda.
Joǵaryda atap ótkenimdeı, agenttiktiń jumysynda sybaılas jemqorlyqtyń aldyn alýǵa basymdyq berilýde. Al parasattylyqty boıyna sińirgen adam eshkimge qııanat jasamaı, jaqsy, adal jolmen júrip, sybaılas jemqorlyqqa jol bermeıdi.
Sybaılas jemqorlyqqa degen tózbeýshilik árbir qazaqstandyqtyń azamattyq ustanymyna, al adaldyq pen satylmaýshylyq minez-qulyq normasyna aınalýy tıis.
Ashat JUMAǴALI,
Sybaılas jemqorlyqqa qarsy is-qımyl agenttiginiń Shymkent qalasy boıynsha departamentiniń basshysy
Túrkistan oblysy