(Qyzylaǵashtyqtarǵa qaıyrymdylyq kómek kórsetý jónindegi búkil qazaqstandyq aksııa kúni Almaty telearnasynan aıtylǵan sóz)
Qadirli dostar, baýyrlar! Qymbatty qyzylaǵashtyqtar!
Qazaqta: “Ot pen sý – tilsiz jaý” degen sóz bar. Ol ras. Men osyǵan taǵy eki jaýdy qosar edim – soǵys pen jer silkiný degen. О́rt pen sý tasqyny, soǵys pen jer silkinisi – adamzattyń ejelgi tórt jaýy. Osy qas jaýlarǵa halyq qasarysyp, qarsy tura bilgen.
Men osy tajaldyń birimen betpe-bet júzdesken kisimin. Ol keshegi Uly Otan soǵysy bolatyn. Qasymda osy Qyzylaǵash, Aqsýdan Táken Maıshynov, Ádiken Seısenbekov, Núsipbek Dúısekenov degen qaharman dostarym bolǵan. Keńes Odaǵy halyqtarynyń yntymaǵy, birligi arqasynda ol zulym jaýdy da jeńgenbiz.
Bıylǵy qys qatal boldy. Abaı aıtqandaı, kári quda – qys álegin asyryp ketti. Shyǵys Qazaqstan oblysy kisi boıy qardyń astynda qaldy. Ol eldiń uıymshyl halqy aıaz, boran, dúleı jelmen qaharmandyqpen kúresip, kári quda-qys tajaldy Altaı taýlarynan asyryp, qýa bastady, qýyp shyǵady, árıne.
Endi, mine, keshegi uly aqynymyz Ilııas Jansúgirovtiń aýyly Qyzylaǵashqa topan sýy tógilip, esil aýyldy typ-tıpyl etti. Ony estigende Almaty qalasynyń halqy da esinen tanǵandaı boldy, teledıdar aldynda únsiz egilip, eńirep otyrdyq. Teledıdar ekrany uly sýretshiler salǵan qaıǵyly ǵajap kartınalardyń birine aınalyp ketkendeı boldy. Ishten tyndyq.
Qymbatty qyzylaǵashtyqtar, baýyrlarym, balalarym, nemerelerim meniń! “Qaıǵy kelse qarsy tur, qulaı berme” dep atamyz Abaı aıtqandaı, bul apatqa da keshegi soǵys kezindegideı erlikpen qarsy turyńdar. Qaıyspańdar, qalqalarym! Búkil Qazaqstan sendermen birge. Ár oblys senderge kóńil aıtyp, kómek jiberip jatyr. Almaty qalasynyń halqy da aıanyp jatqan joq. Mektep, ınstıtýt, ýnıversıtetter, kásiporyndar senderge azyq-túlik, kıim-keshek jiberýde. Osy jerde otyrǵan bárimiz senderge jalaqy, zeınetaqymyzdan jyryp, qarajat jónelttik. О́z basym qyzylaǵashtyqtardyń qoryna dep zeınetaqymnan tıisti qarjy aýdardym.
Jer silkinisi bolǵan apat kezinde armıandarǵa da, ózimizdiń Aral teńizin qutqarý qoryna da, “Semeı-Nevada” qozǵalysy qoryna, Zaısanda jer silkinisi bolyp, Jambyl oblysynyń Turar Rysqulov aýdanyna sý jaıylyp ketken kezderde de jibergen bolatynmyn. О́ıtkeni, men keshegi surapyl soǵys kezinde halyq qasiretiniń qandaı bolatynyn kórgen qarttardyń birimin ǵoı.
Qymbatty dostar, berik bolyńdar, bekem bolyńdar. Es jıyp, erlene túsińder. Sý apatynan opat bolǵan jandardy keshegi soǵys kezinde qaıtys bolǵandar qataryna qosyp, olardyń ornyn toltyrýǵa tyrysyńdar.
Prezıdentimiz Nursultan Ábishuly Nazarbaevtan, Premer-Mınıstrimiz Kárim Másimovten bastap, Úkimetimiz, Parlament, búkil halyq sizdermen birge, sizderdiń qastaryńyzda, qyzylaǵashtyqtar. Solardyń ishinde men de sizderge shyn júrekten kóńil aıtyp, bas ıemin.
Qyzylaǵash qasiretin tartyp, záreleri ushqan kishkentaı balalardyń – keshegi jaýynger joldastarymnyń nemereleriniń, shóbereleriniń bastarynan sıpap, betterinen súıemin.
Sálem joldaýshy Ázilhan NURShAIYQOV, Uly Otan soǵysynyń maıdanger-ardageri, Qazaqstannyń halyq jazýshysy.