Qurlyqtyq hokkeı lıgasynda (QHL) synǵa túsip jatqan elordanyń «Barys» klýby Sochıde jergilikti «Sochı» komandasynan basym tústi.
О́tken týrda «Barys Arenada» «Iokerıt» komandasynan 2:4 esebimen jeńilip, qazaqstandyq kórermenderdiń kóńilin qulazytqan jerlesterimiz bul joly kózdegen maqsatyna qol jetkizdi. Qos komanda oıynshylary birinshi kezeńde qaqpa sańylaýyn taba almaı, úziliske teń eseppen tarqasty. Ekinshi kezeńde jerlesterimiz basymdyqqa ıe bolyp, eki birdeı shaıba soqty. Alǵash Darren Dıs esepti ashsa, Roman Starchenko «Barystyń» ekinshi shaıbasyn soqty. Biraq kezeń sońynda «Sochı» oıynshylary esepti qysqartýǵa múmkindik aldy. Shaıba avtory – Pavel Makarenko.
Úshinshi kezeńde Roman Starchenko dýbl avtory atanyp, Djessı Bleker oıynnyń núktesin qoıdy. Qorytyndy esep – 1:4. Bul jeńisten keıin «Barys» komandasy 44 upaımen «Shyǵys» konferensııasyndaǵy týrnır kestesinde úshinshi orynǵa kóterildi.