Búgin Pedıatrııa ortalyǵynda medısına ǵylymdarynyń doktory, professor, Pedıatrııa jáne balalar hırýrgııasy ǵylymı ortalyǵynyń Bas ǵylymı qyzmetkeri, Qazaqstan Respýblıkasynyń Eńbek sińirgen dárigeri Bolat Habıjanulynyń 80 jyldyq mereıtoı qurmetine oraı saltanatty jıyn bolyp ótti.
Saltanatty jıynǵa arnaıy qatysqan S.J.Asfendııarov atyndaǵy Qazaq ulttyq medısına ýnıversıtetiniń rektory Talǵat Nurǵojın mereıtoı ıesiniń densaýlyq salasyna sińirgen eńbegin atap ótip, qoǵamdyq densaýlyqty damytýǵa jáne Qazaqstan Respýblıkasynyń densaýlyq saqtaý júıesin nyǵaıtýǵa qosqan úlesi úshin Bolat Habıjanulyn «Ýnıversıtet maqtanyshy» tósbelgisimen marapattady. Ýnıversıtet rektory quttyqtaý sózinde sondaı-aq ardaqty ustazdyń oqý orynnyń «Altyn» kitabyna enetindigin jáne Bolat Habıjanulynyń esimi ýnıversıtettiń «Dańq» alleıasyna jazylatyndyǵyn atap ótti.
Bolat Habıjanuly sonymen qatar, Qazaqstan Respýblıkasynyń halqynyń ómiri men densaýlyǵyn saqtaýǵa sińirgen abyroıly eńbegi úshin Ulttyq Medısınalyq qaýymdastyǵynyń joǵary marapaty – «Altyn dáriger» medalimen marapattaldy.
Shara barysynda mereıtoı ıesin sondaı-aq, «Qazaq medısınalyq úzdiksiz bilim berý ýnıversıtetiniń» ujymy, «Astana medısına ýnıversıteti» ujymy men ár oblystan kelgen shákirtteri men áriptesteri quttyqtady.
Jıyn barysynda Pedıatrııa jáne balalar hırýrgııasy ǵylymı ortalyǵynyń basshysy Rıza Boranbaeva Bolat Habıjanulynyń qyzmet joly men ortalyqqa sińirgen eńbegin atap ótip: «Qurmetti Bolat Habıjanuly! Biz Sizdi maqtan tutamyz. Sizdiń jemisti eńbegińizge, sırek kezdesetin basqarýshylyq qasıetińizge, belsendiligińizge, atqaryp jatqan ıgi isterińizben, pedıatrııa salasyna bilikti mamandar daıyndaý isine qosyp jatqan úlesińizge tántimiz. Sizdiń Qazaqstan pedıatrııasy salasyna sińirgen eńbegińiz orasan zor. Shyn júrekten Sizge zor densaýlyq, otbasyńyzǵa baqyt, balalar saýlyǵy jolyndaǵy qyzmetińizge mol tabys tileımiz!», dedi.
Muǵalim men dáriger – bular eń mańyzdy jáne eń qurmetti mamandyqtar. Bul eki mamandyq Bolat Habıjanulynyń ómirinde jemisti qabysa bildi. Ǵalymnyń uzaq eńbek joly búgin de jemisti jalǵasyn taýyp keledi. Uzaq jyldar boıy alǵan bilimi men jınaǵan tájirıbesin jastarǵa úıretýden sharshamaı keledi. Bar ǵumyryn balalar densaýlyǵyna arnaǵan, qurmetti oqytýshy-professor Bolat Habıjanulynyń basty jetistigi – san myńdaǵan qutqarylǵan ómir, myńdaǵan alǵys pen rızashylyq júrek, búginde dáriger atanyp otyrǵan, ónegesi men jolyn jalǵastyrar myńdaǵan shákirtteri.
Bolat Habıjanulynyń júzdegen zertteý jumystary, ǵylymı eńbekteri, «Pedıatrııa» men «Kardıorevmatologııa» salasynda qazaq tilinde jazylǵan oqýlyqtary jas mamandar, jas urpaq úshin máńgi qundy mura bolyp qalmaq.