16 jeltoqsanda Almatydaǵy Balýan Sholaq atyndaǵy Mádenıet jáne sport saraıynda «MTK Global Kazakhstan» kompanııasynyń muryndyq bolýymen ótetin boks keshinde sharshy alańǵa shyǵatyn barlyq 12 jup anyqtaldy.
Táýelsizdik kúnine oraı uıymdastyrylyp otyrǵan aıtýly jarysta óner kórsetetin 12 juptyq segizi jaıynda biz buǵan deıin de qysqasha maǵlumat bergenbiz. Keshe sońǵy tórt jup anyqtaldy.
Atap aıtsaq, ekinshi jartylaı jeńil salmaqtaǵy qazaqstandyq Mırasáli Sársenov (1-0, 1 KO) ázirbaıjandyq Asqar Ragımovpen (3-3, 1 KO) qolǵap túıstiredi.
Birinshi jartylaı orta salmaqtaǵy Nurdos Tólebaıdyń (1-0) da qarsylasy dál sol memleketten. Ol Ramız Mammadovpen (1-0) kúsh synasady.
Jeńil salmaqtaǵy Raı Seıtjanov (1-0) grýzııalyq Gıorgı Abýladzemen (11-1-9, 4 KO) aıqasady.
«MTK Global Kazakhstan» komandasy sapyndaǵy birinshi jartylaı orta salmaqtaǵy áıgili ózbek boksshysy, Olımpıada chempıony Fazlıddın Gaıbnazarov (7-1, 4 KO) Fılıppın eliniń ókili Raıan Sermonamen (21-1-10, 14 KO) sheberlik baıqasady.
Sondaı-aq ózge básekeler myna bylǵary qolǵap sheberleri arasynda ótedi:
Eskendir Harsan (Qazaqstan, 7-0, 6 KO) – Tomas Essomba (Kamerýn, 9-5, 3 KO), asa jeńil salmaq
Nurtas Ájbenov (Qazaqstan, 7-0, 3 KO) – Lendı Krıs Leon (Fılıppın, 13-20-5, 6 KO), jeńil salmaq
Elshat Nyǵmetolla (Qazaqstan, 15-0-1, 5 KO) – Krıs Alfante (Fılıppın, 17-7-1, 9 KO), asa jeńil salmaq
Abaı Tólesh (Qazaqstan, 4-0, 3 KO) – Tomash Bezvoda (Chehııa, 8-10, 5 KO), orta salmaq
Hýrshıd Tojıbaev (О́zbekstan, 3-0, 2 KO) – Aızek Djýnıor (Indonezııa, 26-13-3, 9 KO) ekinshi jartylaı jeńil salmaq
Alıý Bamıdele Lasısı (Nıgerııa, 13-0, 8 KO) – Hamson Lamandaý (Indonezııa, 10-4-1, 7 KO) ekinshi jartylaı asa jeńil salmaq
Al osy boks keshinde eki birdeı altyn belbeýdiń sarapqa salynatynyn esterińizge sala keteıik. Tarqatyp aıtsaq, áli eshkimnen jeńilmegen jeńil salmaqtaǵy qazaqstandyq Vıktor Kotochıgov (10-0, 4 KO) ózine tıesili WBC International nusqasynyń chempıondyq tájin qorǵap qalý úshin Argentınanyń azýly boksshysy Haver Hose Klaveromen (27-5, 5 KO) kúsh synasady.
Ekinshi jartylaı jeńil salmaqtaǵy Sultan Záýirbek (8-0, 6 KO) WBC Youth World Champion nusqasynyń altyn belbeýi úshin qytaılyq Leshan Lımen (16-3-2, 9 KO) judyryqtasady.