Shymkenttegi M.Áýezov atyndaǵy Ońtústik Qazaqstan Memlekettik ýnıversıtetinde kórnekti qoǵam jáne memleket qaıratkeri Turar Rysqulovtyń 125 jyldyǵyna arnalǵan halyqaralyq ǵylymı konferensııa ótti.
Shymkent qalasy ákimdiginiń qoldaýymen ótken «Qazaq eliniń umytylmas tulǵalary» atty konferensııada ataqty ǵalym, qoǵam jáne memleket qaıratkeriniń ómiri men saıası qyzmeti, respýblıkanyń áleýmettik-ekonomıkalyq jaǵdaıyn qalyptastyrý jáne damytý barysyndaǵy eńbekteri tanystyryldy.
Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń «Bolashaqqa baǵdar:Rýhanı jańǵyrý» jáne «Uly dalanyń jeti qyry» atty baǵdarlamalyq maqalalarynda aıtylǵan murattarmen úndes sharaǵa elimizben qatar alys-jaqyn shetelderden ǵalymdar men tarıhshylar, el damýyna úles qosqan mártebeli qonaqtar qatysty. Sondaı-aq, konferensııaǵa uly tulǵanyń máskeýlik nemeresi Vladımır Rysqulov pen Almaty qalasy men Túlkibas aýdanynda turatyn urpaqtary keldi. Tarıhqa taǵzym jasaǵan shara Turar Rysqulovtyń eskertkishine gúl shoǵyn qoıýdan bastaldy.
Saltanatty jıynda sóz alǵan ǵalymdar Turar Rysqulovtyń qysqa ǵana ǵumyry men jaryq juldyzdaı jarqyn ómirin, táýelsiz Qazaqstanǵa qaldyrǵan baǵa jetpes baılyǵyn, naǵyz patrıotızm men bolashaq urpaq úshin janqııarlyq kúrestiń úlgisi bolǵan azamattyǵy haqynda baıandama jasady. Qazaqstannyń damýymen qatar Ortalyq Azııa respýblıkalarynyń, Reseı Federasııasynyń jáne Mońǵolııanyń ekonomıkalyq ósýine, qaryshtap damýyna úlken úles qosqanyn atap ótti.
«Ǵylymı konferensııanyń maqsaty – Turar Rysqulovtyń beınesine taǵy da bir toqtalý boldy. Onyń bastamasymen elimizde Túrkistan-Sibir ıaǵnı Túrkisib temirjoly salynǵan. Sondaı-aq qýatty óndiristik ortalyqtar Qaraǵandy qalasynyń kómir óndirý jáne metallýrgııa kesheni, Shyǵys jáne Ońtústik Qazaqstannyń tústi metallýrgııasy, Batys Qazaqstannyń munaı-gaz salasy óndiriske engizildi. Qazaqstan men Orta Azııa aýmaǵynda búkilodaqtyq mańyzy bar iri ulttyq qoryqtar quryldy»,- dedi OQMÝ rektory, QR Ulttyq ǵylym akademııasynyń akademıgi, tarıh ǵylymdarynyń doktory Darııa Qojamjarova.
Shymkent