Aǵa gazetimizge shyqqan Parlament Májilisiniń depýtaty Ramazan Sárpekov «Qazaqy tárbıe qasıeti» dep atalatyn maqalasyn oqyp shyqtym. Úlken oıǵa qaldym. El aǵasynyń áriden tartyp aıtqan aqyldy áńgimesi kókeıińizge qup uıalaıdy, kókjıegi keń qııalǵa jeteleıdi.
Baıaǵyda bir qurdasym aıtyp edi: «Men jylasam – ózge jurt óksigin basa almas edi» dep. Sol aıtqandaı, bári ras – búgingi qala jastarynyń ana tilimizdi úırenýge qulqy joq... beıbas júristi... ýaqytyn tekke ótkizedi... úlkenniń sózin qaperge almaıdy... el aǵasynyń zar keship tógildirgen syryn «Myń bir túnniń» áńgimesindeı myń betke jalǵap soza túsýge bolar edi. Búgingi keleńsiz ádet-ǵuryp, syrttan kelgen jyltyraqqa áýestený, oılanbaı sóıleý, oısyz júrý, ómir atty qyl kópirden taıyp ketýge bolatyndaı jónsiz qylyqqa barý – qadam basqan saıyn jıi kezdesedi. О́kinemiz, ókinip otyryp óksip turyp jylaǵymyz keledi. Qolymyzdan kelgenshe qyl kópirden taıyp bara jatqan álgi jastyń betin jaryq jaqqa buryp jibergimiz keledi. Jaqsy kisilerge salysa júrýge shaqyramyz. Jaqsydan úıren, qylyqty júr, uıatty umytpa, eńbekke beıim bol, ultyńdy ulyqtaı bil deımiz!
Maqalada kóterilgen oı kópten kókeıimizde júrgeni ras. Bilgen soń, kórgen soń, sezgen soń – kúıip sóılegen sekildi. О́z basym ne nársege bolsyn kúıip sóılegendi, qaı jaıtqa arnalmasyn – kúıip-janyp istegendi unatamyn. Alber Kamıýdiń «Nemquraıdy» atty romanynyń keıipkeri sekildi dúnıege, mańaıdaǵy qujynaǵan ómirge jáı júrgen nemquraıdynyń, ózimshildiń kózimen emes; osy elge, týysqan halqymyzǵa kúıip-janyp syr ashqany tánti etedi Sárpekovtyń!
Dúkenbaı DOSJAN,
jazýshy, Memlekettik syılyqtyń laýreaty.