Qurlyqtyq hokkeı lıgasynda (QHL) synǵa túsip jatqan elordanyń «Barys» klýby Máskeý oblysynyń «Vıtıaz» komandasynan basym tústi.
Oıyndy tamashalaýǵa kelgen úsh myńǵa jýyq jankúıer jeti birdeı tamasha goldyń kýási boldy. Muzaıdyn ıelerinen 14-mınýtta Iаkýb Erjabek pen 48-mınýtta Svıatoslav Grebenshıkov mergendigimen kózge tústi. Al «Barys» sapynan Korben Naıt (18-mınýt), Kertıs Volk (24) jáne Dmıtrıı Shevchenko (39) qarsylas komandanyń qaqpasyna bir-bir shaıba soqsa, Lınýs Vıdell 33 jáne 53-mınýtta gol soǵyp, dýbl avtory atandy. Qorytyndy esep – 2:5. «Barystyń» paıdasyna.
Bul jeńisinen keıin elorda komandasy QHL-diń «Shyǵys» konferensııasynda 50 upaımen úshinshi orynda keledi.