AITV juqtyrǵandar erekshe qoldaýǵa ıe bolady

IýNISEF Eńbek jáne halyqty áleý­met­tik qorǵaý mınıstrligimen birle­sip 2019-2021 jyldarǵa arnalǵan «Qa­zaq­s­tanda AITV juqtyrǵan balalar men jas­óspirimderdi jáne olardyń ata-ana­laryn psıhologııalyq-áleýmettik qol­daý men beıimdelýin damytý» bir­les­ken baǵdarlamasyn júzege asyrýda. Baǵ­dar­lama AITV juqtyrǵan balalar men jasóspirimderdi jáne olardyń ata-analaryn, qamqorshylaryn psıho-áleýmettik qoldaý máseleleri boıynsha áleýetin damytý jumystary qolǵa alynǵan.

«Qazaqstan densaýlyq saqtaý salasyn­da aıtarlyqtaı nátıjelerge qol jetkizdi. Balalar densaýlyǵyna baı­la­nysty da jetistikter az emes. Den­saý­lyq – tek fızıkalyq jaǵdaı ǵana emes, psıhıkalyq kúıdi de qamtıdy. Gepatıt, týberkýlez, AITV jáne dıabet sııaq­ty sozylmaly aýrý­lar úlkenderdiń ózine ońaıǵa soqpaıdy. Al mundaı dert­terge shaldyqqan balalar erekshe qol­daýǵa muqtaj jáne bul úshin keshen­di túrde jumys isteý qajet. Biz osy baǵyttaǵy jumysty Eńbek jáne halyqty áleýmettik qorǵaý, Densaýlyq saq­taý mınıstrlikterimen birge júzege asyryp jatqanymyzǵa qýanyshtymyz», dedi IýNISEF-tiń Qazaqstandaǵy ókili Artýr van Dızen.

Mamandardyń aıtýynsha, sońǵy jyldary Qazaqstanda AITV juqtyrý jáne ana­dan balaǵa ınfeksııanyń berilýi tó­men­degen. Búginde AITV-niń oń mártebesimen 531 bala men jasóspirim tirkelgen. «Qazaqstanda AITV juq­tyr­ǵan balalar men jasóspirimderge em qabyldaý, qaýipsiz júris-turys týraly bilimdi joǵarylatý jáne ómirlik daǵdylardy damytý ózekti másele bolyp qalýda. Sondyqtan adamdar ara­synda AITV týraly alypqashpa aqpa­ratty azaıtyp, qorqynyshty seıil­týimiz kerek», dedi IýNISEF baǵdar­la­ma­synyń densaýlyq saqtaý jáne tamaq­ta­ný jónindegi úılestirýshisi Qanat Sýhanberdıev.

Sondaı-aq basqosýǵa Qaraǵandy medısına ýnıversıteti, oblystyq JITS ortalyqtary, Qazaq dermatologııa jáne juqpaly aýrýlar ǵylymı ortalyǵy jáne úkimettik emes uıymdardyń ókilderi qatysty. Keńes qorytyndysy boıynsha oqý oryndarynyń baǵdarlamalaryna modýldi engizý jospary ázirlendi. Modýl dárigerlerdi, psıhologtar men áleýmettik qyzmetkerlerdi sozylmaly aýrýlarmen aýyratyn balalarmen jáne jasóspirimdermen sapaly jańa deńgeıde jumys isteýge daıarlaıdy.

«Biz bul modýldiń AITV juqtyrǵan balalarmen ǵana emes, sonymen qatar basqa da sozylmaly aýrýlarmen jumys isteý sapasyn jaqsartý úshin medısına qyzmetkerlerin daıarlaıtyn joǵary oqý ornyna deıin jáne joǵary oqý ornynan keıingi bilim berý baǵdarlamalaryna engizemiz dep úmittenemiz», dedi Qazaq dermatologııa jáne ınfeksııalyq aýrýlar ǵylymı ortalyǵynyń dırektory Baýyrjan Baıserkın.