Halyqtyń quqyqtyq saýattylyǵy men sybaılas jemqorlyqqa qarsy is-qımylda aldyn alý sharalarynyń tıimdiligin arttyrý, jasalǵan faktilerge ýaqtyly den qoıý maqsatynda Sybaılas jemqorlyqqa qarsy qyzmetiniń 1424 Call-ortalyǵy turaqty jumys isteıdi. Bul týraly uıymnyń baspasóz qyzmeti habarlady.
Habarlasqan azamattardyń ótinishteri áleýmettik salaǵa qatysty, turmystyq sybaılas jemqorlyqtyń jolyn kesýge múmkindik beredi.
Tek aǵymdaǵy jyly osyndaı ótinishter boıynsha 56 sotqa deıingi tergeý bastalyp, 18-i sotqa jiberildi.
Qylmystar týraly ýaqtyly habarlaý, shuǵyl sharalar qabyldaý olardyń jasalýynyń jolyn kesýge jáne jazadan bultartpaýǵa múmkindik beredi.
Aǵymdaǵy jyldyń qyrkúıek aıynda Almaty qalasynda № 98 jalpy bilim beretin mekteptiń dırektory Naızabekova oqýshyny aýystyrǵany úshin 50 myń teńge kóleminde para alǵany áshkerelenáp, nátıjesinde ol memlekettik qyzmette laýazym ıelený quqyǵynan ómir boıyna aıyra otyryp, 1 mln 250 myń teńge kóleminde aıyppul salyndy.
Osy aımaqta aǵymdaǵy jyldyń 5 qarashasynda Almaly aýdanynyń № 2 aýdandyq sotynyń úkimimen qalalyq MSQB bas mamany B. B. Bolataev 400 myń teńge para alýǵa oqtalǵany úshin kináli dep tanyldy. Sheneýnik memlekettik qyzmette laýazym atqarý quqyǵynan ómir boıyna aıyrylyp, 9 mln teńge kóleminde aıyppul salyndy.
Aǵymdaǵy jyldyń 19 jeltoqsanynda Atyraý qalasynyń № 2 sotynyń úkimimen qalalyq IIB Ákimshilik polısııa bóliminiń aǵa ınspektory D. Qalbaev azamattan ákimshilik jaýapkershilikke tartpaǵany úshin 40 myń teńge kóleminde para alǵany úshin kináli dep tanyldy. Polısııa qyzmetkerine 1 mln 200 myń teńge kóleminde aıyppul salynyp, memlekettik qyzmette jáne arnaıy qyzmette jumys atqarý quqyǵynan ómir boıy aıyrylyp, polısııa aǵa leıtenanty arnaıy sheninen aıyryldy.
Túrkistan oblysyndaǵy birqatar qylmystyq ister boıynsha, atap ótsek, Jetisaı aýdanynyń bir orta mektebiniń dırektoryna – aǵylshyn tili pániniń muǵalimi jumysqa ornalasqany úshin azamattan 100 myń teńge para aldy degen kúdikke, Saıram aýdanynyń jumyspen qamtý jáne áleýmettik baǵdarlamalar bóliminiń bas mamanyna kópbalalyq boıynsha járdemaqy aýdarǵany úshin para alýyna qatysty tergeýler jalǵasýda.
Sybaılas jemqorlyqqa qarsy qyzmettiń 1424 Call-ortalyǵy azamattardy sybaılas jemqorlyqqa qarsy saıasatty jetildirýge belsendi qatysýǵa, usynystar men usynymdar engizýge, sybaılas jemqorlyq faktileri týraly jedel habarlaýǵa shaqyrady. 1424 nómiri uıaly telefonnan da, qalalyq telefonnan da qoljetimdi, qońyraý shalý tegin.