Parlament Senaty Qarjy jáne bıýdjet komıtetiniń keńeıtilgen otyrysynda «Qazaqstan Respýblıkasynyń keıbir konstıtýsııalyq zańdaryna ózgerister men tolyqtyrýlar engizý týraly» Konstıtýsııalyq zań jobasy qaraldy. Bul týraly Parlament Senatynyń baspasóz qyzmeti habarlady.
Zań jobasy Qazaqstan Respýblıkasynyń Tuńǵysh Prezıdentiniń 2018 jylǵy 5 qazandaǵy Qazaqstan halqyna Joldaýyn iske asyrý jónindegi Jalpy ulttyq jospardy, «100 naqty qadam» Ult josparyn, sondaı-aq Qazaqstan Respýblıkasy Prezıdentiniń janyndaǵy Sheteldik ınvestorlar keńesiniń 9-shy jalpy otyrysynda berilgen hattamalyq tapsyrmany oryndaý úshin ázirlengen bolatyn. Hattama boıynsha AHQO memlekettik organdarmen birlese otyryp, Dýbaı qalasyndaǵy Halyqaralyq qarjy ortalyǵynyń úlgisi boıynsha ınvestısııalyq rezıdent qaǵıdasyn engizý máselesin qaraý tapsyryldy.
Zań jobasyn ázirleýdiń maqsaty elimizdiń negizgi qarjy tuǵyrnamasy retinde AHQO-nyń jyldam qalyptasýy men damýyn qamtamasyz etý jáne ınvestısııalardy tartý úshin onyń ıýrısdıksııasyn paıdalaný bolyp tabylady.
Zań jobasynda «ınvestısııalyq rezıdent» uǵymyn engizý kózdelip otyr, sondaı-aq ınvestısııalyq rezıdentterge beriletin talaptar men jeńildikterdi retteıdi.
«Investısııalyq salyq rezıdenttigi baǵdarlamasy» uǵymy engiziledi. Baǵdarlamada ınvestısııalaýdyń kólemi men quraldary, ınvestısııalyq salyq rezıdenttigin alý rásimderi aıqyndalatyn bolady.
Zań jobasynda bıýdjetten AHQO-ny qarjylandyrýǵa arnalǵan nysanaly aýdarymdardy qosymsha qun salyǵynan bosatý usynylady. Sondaı-aq rezıdent emesterdiń AHQO úshin kórsetilgen qyzmetteri/jumystary men AHQO qatysýshylarynyń qyzmetterin qosymsha qun salyǵyn salýǵa jatatyn aınalym dep eseptemeý usynylady.
Odan basqa, zań jobasymen «Salyq jáne bıýdjetke tólenetin basqa da mindetti tólemder týraly» (Salyq kodeksi) Qazaqstan Respýblıkasy kodeksiniń erejelerine sáıkes, «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýsııalyq Zańyndaǵy jalpyǵa birdeı deklarasııalaýdy engizý merzimderin 2020 jyldan 2021 jylǵa aýystyrý bóligine ózgerister engiziledi.
Zań jobasy Palatanyń qaraýyna berildi.