Kókshetaý qalasy boıynsha tutynǵan aýyz sýǵa turǵyndardyń bereshegi 139 mıllıon teńgeden asty. Taıaýda «Kókshetaý sý arnasy» kásipornynyń qyzmetkerleri qaryzy kóbeıgen birneshe úılerdi sý jelisinen ajyratty.
Prıvokzalnyı kóshesindegi jekemenshik úılerdiń biriniń «Kókshetaý sý arnasy» kásipornyna 15 myń teńge kóleminde qaryzy bar. Buǵan deıin birneshe eskertý alǵan úı ıesi qaryzyn tóleýge qarajatynyń joqtyǵyn aıtyp alaqan jaıyp otyr. Degenmen, qaryzdy óteý paryz. Bul úı ýaqytsha jeliden ajyratyldy.
– Bul qarajat bireýler úshin az ǵana soma bolyp kórinýi múmkin. Al bizdiń mekeme úshin aıtarlyqtaı qarjy. О́ıtkeni eńbekkerlerdiń eńbekaqysy. Olardyń da ata-analary, otbasy balalary bar. Sondyqtan, tutynǵan ónimniń aqysyn ýaqytyly tóleý qajet, – deıdi «Kókshetaý sý arnasy» kásipornynyń bólim jetekshisi Ásel Esenǵojına.
Jumabek Táshenov kóshesinde ornalasqan 54-shi úıdegi páterlerdiń biri de sýdan ajyratyldy. Úı ıesi kásiporynǵa 20 myń teńge bereshek. Úı ıesi aqyny tólegenin aıtýda, biraq qolynda túbirtek joq.
– Kúnine shamamen 10 shaqty úıdi sýdan ajyratamyz. Krandy jaýyp, mór basyp, bekitemiz. Úı ıesi aqy tólegen soń úıge qaıta sý beriledi. Eger úı ıesi bekitilgen krandy óz erkimen qosyp alsa, árıne, aıyppul salynady,–deıdi «Kókshetaý sý arnasy» kásipornynyń ınspektory Nurjan Poshanov.
Kásiporyn qyzmetkerleri buǵan deıin 86 páter men jekemenshik úıdi aýyzsýdan ajyratqan. Sot oryndaýshylarynda óndiriste 1500-den asa is jatyr. Ol qujat boıynsha óndirilýi tıis qarajat 58 mıllıon teńgeden asady.