Jastar jylynyń qorytyndysy aıasynda dástúrli oblystyq «Jas Aqmola» jastar júldesimen jáne «AQMOLA POWER» oblystyq ınnovasııalyq ıdeıa men jobalar konkýrsy jeńimpazdary marapattaldy. Saltanatty sharaǵa óńir basshysy Ermek Marjyqpaev qatysyp, jastarǵa sáttilik tiledi.
Belsendi jastardyń yntasyn ashyp, qyzmetke degen erik-jigerin qaıraý úshin eńbegin elep, qolǵa alǵan bastamalaryna qoldaý kórsetip otyrǵan abzal. Sharaǵa óńirimizdegi qaı salada bolsyn atoılap alda júrgen, naǵyz sen tur, men ataıyn deıtin kil myqty jastar jınaldy. О́ńir basshysy Ermek Boranbaıuly óńirimizde jastardy qoldaý baǵytynda qolǵa alynyp jatqan sharalardy ataı otyryp, olardy tynbaı eńbektenýge shaqyrdy.
– Jastar jylynyń saltanatty ashylýynda Elbasy Nursultan Ábishuly Nazarbaev: «Jastar elimizdiń qazirgi álemde básekege qabilettiliginiń basty faktory» dep atap ótken bolatyn. Búgingi is-shara jastardyń qoǵamdyq sananyń qýatty qozǵaýshy kúshi ekendiginiń taǵy bir dáleli,–dedi oblys ákimi Ermek Marjyqpaev.
Aǵymdaǵy jyl aqmolalyq jastar úshin jemisti jyl boldy. Jyl basynan beri 6 myńnan astam jas jumysqa ornalastyryldy. Onyń ishinde «Eńbek» baǵdarlamasy boıynsha 140 adam áleýmettik jumys oryndaryna jáne 722 adam is-tájirıbesine jiberildi. 412 stýdent oblys ákiminiń granty boıynsha bilim alýda. «Jas Aqmola» dástúrli oblystyq jastar júldesimen 17 jas jáne «AQMOLA POWER» oblystyq ınnovasııalyq ıdeıa men jobalar konkýrsynyń 12 jeńimpazdaryna 200 000, 250 000 jáne 350 000 teńgeniń sertıfıkattary tabystaldy.
– Men «AQMOLA POWER» oblystyq ınnovasııalyq ıdeıa jobasynyń qatysýshysymyn. Atalmysh jobaǵa sýmen jumys isteıtin qozǵaltqyshty usyndym. Qazylar alqasy eńbegimizdi elep jatqanyna qýanyshtymyn. Osy qozǵaltqyshty tolyq jetildirip, qoldanysqa qosqym keledi,–deıdi «Jas Aqmola-2019» júldesiniń ıegeri Álıhan Qaıyr.
Mundaı marapattaýlar daryndy jastardy odan ári yntalandyrýǵa septigin tıgizetini haq.