Parlament Senatynyń Tóraǵasy Darıǵa Nazarbaeva Qazaqstannyń isker áıelderi qaýymdastyǵynyń múshelerimen kezdesti. Bul týraly Parlament Senatynyń baspasóz qyzmeti habarlady.
Sharaǵa Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri, Almaty qalasy ákiminiń Áıelder isteri jáne otbasylyq-demografııalyq saıasat jónindegi komıssııasynyń ókilderi, sondaı-aq Qazaqstannyń isker áıelderi aımaqtyq qaýymdastyqtarynyń tóraǵalary qatysty.
Qatysýshylar Senat Tóraǵasyna Qazaqstandaǵy áıelderdiń jaǵdaıy týraly egjeı-tegjeıli áńgimeledi jáne áleýmettik zertteýdiń nátıjelerimen tanystyrdy. Isker áıelder qaýymdastyǵynyń málimetterine sáıkes, elimizdegi áıelderdiń 57 paıyzy turaqty jumys istemeıdi jáne ózin-ózi jumyspen qamtyǵandar nemese jumyssyzdar mártebesinde bolyp tabylady. Olar kóbinese aýyldyq jerlerdegi áıelder. Kezdesýge qatysýshylar qoǵamdaǵy áıelder jaǵdaıyn jaqsartý jónindegi usynystardyń ázirlenýi ahýaldy jaqsartýy múmkin, dep sanaıdy. Osyǵan baılanysty jol kartasy tanystyryldy. Bul qujat aıasynda elimizdiń saıası, ekonomıkalyq jáne qoǵamdyq ómirine qatysý úshin áıelderge teń múmkindikter jasaý jónindegi keshendi jospardy iske asyrý kózdelip otyr.
Sonymen qatar, isker áıelder qaýymdastyǵynyń ókilderi bıylǵy qazan aıynda qurylǵan Qazaqstandaǵy áıelder kúshteri alıansynyń qyzmeti týraly aıtyp berdi.
Darıǵa Nazarbaeva óz sózinde Qazaqstandaǵy áıelder kúshteri alıansynyń qurylýyna qoldaý bildirip, áıelderdiń birigýiniń mańyzdylyǵyn atap ótti. «Sizderdiń alǵashqy qadamdaryńyz – óte durys jáne zerdelengenin, óıtkeni Sizderdiń árqaısylaryńyz osynda óz bilimderińiz jáne tájirıbelerińizben kelgenderińizdi kórip otyrmyz. Qoıylǵan mindetter deńgeıi joǵary ekenin aıta ketken jón. Áıelderdi saıasatqa kóbirek tartý kerek. Eldegi áıelder bóliginiń belsendi bolýy asa mańyzdy. Halyqtyń alýan toptarynyń túrli múddelerin bildiretin áıelderdi tartý – Alıanstyń mindeti. Sizderdiń artyńyzdan basqalar da alǵa ilgerileýi kerek», - dedi Darıǵa Nazarbaeva.