Senat otyrysynda zańnamaǵa qylmystyq, qylmystyq-prosestik zańnamany jetildirý jáne jeke adam quqyqtarynyń qorǵalýyn kúsheıtý máseleleri boıynsha túzetýler eki oqylymda qaralyp, qabyldandy. Bul týraly Parlament Senatynyń baspasóz qyzmeti habarlady.
Senatta zań jobasyn tanystyrǵan Bas prokýrordyń orynbasary Marat Ahmetjanov qujat qoldanystaǵy qylmystyq jáne qylmystyq is júrgizý zańnamasyn jetildirý, sondaı-aq Qazaqstan Respýblıkasy Prezıdentiniń qylmystyń jekelegen quramy jónindegi tapsyrmalaryn júzege asyrý maqsatynda ázirlengenin atap ótti.
Qosymsha baıandama jasaǵan senator Vladımır Volkov zań jobasynda birqatar negizgi baǵyttar boıynsha zańnamalyq aktilerge ózgerister men tolyqtyrýlar engizý kózdelip otyrǵanyn jetkizdi.
Zorlaý jáne jynystyq sıpattaǵy kúsh qoldaný áreketteriniń barlyq quramy úshin, balalarǵa jynystyq zorlyq jasaý faktileri boıynsha dáleldemelerdi burmalaǵany úshin, sondaı-aq ony jasyrǵany jáne habarlamaǵany úshin jaýapkershilik kúsheıtiledi;
Úı-jaıǵa, qoımaǵa nemese kólik quralyna kirip jasalǵan urlyq, tonaý jáne qaraqshylyq úshin jaýapkershilik kúsheıtiledi.
Zańsyz esirtki aınalymyna elektrondyq aqparattyq resýrstardy paıdalanǵany úshin jaýapkershilik engiziledi.
Mal urlyǵy boıynsha qylmystyń jeke quramy engiziledi.
Zańsyz ań aýlaýdy qylmystyq teris qylyqtan ortasha aýyrlyqtaǵy qylmysqa aýystyrý, brakonerlik qylmystyń aýyrlatatyn quramy (onyń ishinde aqbókender boıynsha) jáne zorlyq-zombylyq qoldanǵany, sondaı-aq janýarlar dúnıesin qorǵaý jónindegi memlekettik ınspektordyń ómirine qaýip tóndirgeni úshin jaýapkershilikti kúsheıtý úshin qarastyrylǵan.
Sonymen qatar, odan ári izgilendirý jáne jazalaýshylyqty tómendetý bóligine, atap aıtqanda, múlikti tárkileýdi taǵaıyndaý jáne shartty jaza taǵaıyndaý kezinde, sondaı-aq kepilgerlikke baılanysty jazadan bosatý kezinde kepil mólsherin tómendetý boıynsha túzetýler usynylady.
Sondaı-aq qylmystyq-atqarý zańnamasyna jazany oryndaý júıesin odan ári izgilendirýge baǵyttalǵan túzetýler usynylady.