Aqparat jáne qoǵamdyq damý mınıstrligi qoldaý bildirgen jas kitapqumarlardyń básekesine óńirdiń barlyq aýdany men Taraz qalasynan 55 oqýshy baq synap, ózderiniń zııatkerlik qabiletterin kórsetti.
Jastardyń ıntellektýaldyq deńgeıin qalyptastyrý maqsatyndaǵy baıqaýdy Jambyl oblysynyń «Rýhanı jańǵyrý» jobalyq ofısi men Shoqan Ýálıhanov atyndaǵy oblystyq ámbebap-ǵylymı kitaphanasy birlesip uıymdastyrdy.
Erejege sáıkes, baıqaý eki kezeńge, eki sanatqa bólindi. Qatysýshylarǵa ádebıet jáne ǵylym salalarynda ózindik orny bar tulǵalardyń arnaıy belgilengen 43 kitaby usynyldy. Birinshi kezeńnen súrinbeı ótken 22 qatysýshy aqtyq synda da ózderi tańdap oqyǵan kitaptardan qoıylǵan suraqtarǵa naqty jaýap bere bildi. Baıqaýda 15 jasqa deıingi qatysýshylar arasynan I oryndy Taraz qalasyndaǵy №48 T.Rysqulov atyndaǵy orta mekteptiń 6-synyp oqýshysy Amına Muhtar jeńip alsa, II oryndy Jambyl aýdany, Birlesý-Eńbek aýylyndaǵy orta mekteptiń 7-synyp oqýshysy Saıda Jahan, al III oryndy Jambyl aýdany, Birlesý-Eńbek aýylyndaǵy orta mekteptiń 9-synyp oqýshysy Eldos Joldybaı ıelendi. Sonymen qatar 15 jastan joǵary qatysýshylar arasynan I oryndy Taraz qalasyndaǵy №54 orta mekteptiń 10-synyp oqýshysy Ásel Aıajan ıelense, II oryndy Merki aýdany, №6 orta mekteptiń 10-synyp oqýshysy Dıana Jeksenbıeva jáne III oryndy Jambyl polıtehnıkalyq joǵary kolledjiniń 2-kýrs stýdenti Aqnur Bashırova jeńip aldy. Baıqaýǵa barlyq qatysýshylar men olardyń jetekshilerine Alǵys hattar, al jeńimpazdarǵa baǵaly syılyqtar tabys etildi. Júldegerlerdi oblystyq «Rýhanı jańǵyrý» jobalyq ofısi» mekemesiniń basshysy Zarına Qýatova marapattady.
Aıta keteıik, áýel basta bul baıqaý ótken jyldyń mamyr aıynda Taraz qalalyq «Jambyl-Taraz» qoǵamdyq-saıası gazetiniń bastamasymen qala aýmaǵynda uıymdastyrylǵan edi. «Qazfosfat» jaýapkershiligi shekteýli seriktestiginiń bas dırektory, Qazaqstannyń Eńbek Eri Muqash Eskendirovtiń demeýshiligimen eń úzdik atanǵan jas oqyrmanǵa 1 mıllıon teńge, al qalǵan jeńimpazdarǵa da qomaqty qarjylaı syılyqtar tabystalǵan bolatyn.
Jambyl oblysy