«Aqtóbe» komandasy Eýropa lıgasyndaǵy úshinshi irikteý kezdesýleriniń alǵashqy oıynynda óz alańynda Islandııanyń «Breıdablık» komandasyn qabyldady. Jergilikti jankúıerler bul joly da aqtóbelikterden jeńis kútkeni shyndyq. Súıikti komandasynyń oıynyn Qobylandy batyr atyndaǵy Ortalyq stadıonnan kórýge yqylastylardyń barlyǵynyń armany júzege asýy qıyn boldy. Ortalyq stadıonda otyryp matchty tamashalaýǵa jınalǵan 13500 jankúıer qoldaýymen bastalǵan oıyndy stadıonǵa syımaı qalǵandar úshin syrtqa qoıylǵan úlken teledıdar ekranynan tamashalaýǵa da múmkindik jasaldy.
«Aqtóbe» komandasy Eýropa lıgasyndaǵy úshinshi irikteý kezdesýleriniń alǵashqy oıynynda óz alańynda Islandııanyń «Breıdablık» komandasyn qabyldady. Jergilikti jankúıerler bul joly da aqtóbelikterden jeńis kútkeni shyndyq. Súıikti komandasynyń oıynyn Qobylandy batyr atyndaǵy Ortalyq stadıonnan kórýge yqylastylardyń barlyǵynyń armany júzege asýy qıyn boldy. Ortalyq stadıonda otyryp matchty tamashalaýǵa jınalǵan 13500 jankúıer qoldaýymen bastalǵan oıyndy stadıonǵa syımaı qalǵandar úshin syrtqa qoıylǵan úlken teledıdar ekranynan tamashalaýǵa da múmkindik jasaldy.
Chehııalyq bas tóreshi Lıbar Kovarjık oıyndy bastaǵannan keıin-aq jankúıerler «Aqtóbe» dep daýystap qoldaý kórsetýden tanbady. Kezdesýdiń tórtinshi mınýtynda qarsylastar qaqpasyna alǵashqy soqqy jasalýy jankúıerlerdi jyldam goldan dámelendirip, odan saıyn jelpindirdi.
Oıynnyń 6 mınýtynda Andreı Harabara qaqpaǵa týra soqqy baǵyttap úlgerdi. Osylaı alǵashqy mınýttardan bastap qarsylastar qaqpasyn qaraýyldaýǵa kóshken jerlesterimiz órnekti oıyn kórsetýge tyrysyp-aq baqty. Degenmen, tasqamal qorǵanysqa kóshken ıslandııalyqtar aıyp alańynda saýatty oınap, kóterip berilgen pastar men shabýyldardyń betin qaıtaryp otyrdy. Ásirese, qaqpashy Gýnnleıfer Gýnnleıfsson sheberlik kórsetti. Ol Andreı Harabaranyń, Petr Badlonyń soqqylaryn qınalmaı qaıtara bildi. Ara-tura qarsylastar da qarsy shabýylǵa shyǵyp, Andreı Sıdelnıkovtyń qyraǵylyǵyn baqylaǵan kezder boldy. Alaıda, aqtóbelik qaqpashy qapysyz qımyldady. Bul joly aqtóbelik shabýylshy Sergeı Davydov ta qansha tyrysqanymen aıyp alańynda shalt qımyldaýdyń ornyna, uzyn boıly ıslandııalyqtardan aılasyn asyra almady.
Osy oıyn órnegi ekinshi taımda da jalǵasty. Alań ıeleri alǵashqy mınýttardan shabýyldaǵanymen qarsylastar qapysyz qorǵandy. Marat Haırýllın «Breıdablık» komandasy qaqpasynyń dál ortasyna soqqy jasady, bul dop qarsylastar qaqpashysynyń qaqshyp alýyna esh qıyndyq keltirmedi. Osyndaı jaǵdaıdy Petr Badlo da qaıtalady. Sergeı Davydov dopty baspen qaqpadan qııas uryp, qapy qaldy. Oıynnyń ekinshi kezeńiniń ortasynan óte Arzýmanıannyń ornyna shyqqan Emıl Kenjesarıev, Kovalchýkti almastyrǵan Aleksandr Geınrıh shabýyldy qyzdyra tústi. Sergeı Davydovty almastyrǵan Sergeı Grıdın oıynǵa sál de bolsa qarqyn qosqandaı boldy. Osy úsheýiniń tize qosa ózge oıynshylarmen túsinise shabýyldy údetýi de nátıjesiz aıaqtalyp jatty. Eshqaısysy da qaqpashyny qapy qaldyratyndaı ádemi soqqy jasaı almady. Álsin-álsin qarsylastardyń aıyp alańyna barǵan aqtóbelikter oıynnyń sońǵy mınýtynda degenderine jetti. Aıyp alańynda ıslandııalyq oıynshy dopty alyp sytylyp bara jatqan Aleksandr Geınrıhtiń ústine jata qalyp, qulatyp, oıyn erejesin buzdy. Chehııalyq bas tóreshi Lıbar Kovarjık esh oılanbastan 11 metrlik aıyp dobyn belgiledi. Aıyp dobyn urǵan Marat Haırýllın qarsylastar qaqpasynyń oń jaq buryshyna ádemi soqqy baǵyttady. «Breıdablık» komandasynyń qaqpashysy Gýnnleıfýr Gýnnleıfsson soqqy baǵytyn ańǵaryp qalǵanmen dál soǵylǵan dopty toqtatýǵa dármeni jetpedi. Esep 1:0 aqtóbelikter paıdasyna sheshildi. Endi jaýap oıyn 8 tamyzda Islandııada ótedi. Árıne, aqtóbelikter pleı-offqa shyǵýy úshin oıyn órnegin anaǵurlym shıratyp, jigermen kelgen jeńisti jalǵastyrýdyń jolyn izdeýi tıis.
Satybaldy SÁÝIRBAI,
«Egemen Qazaqstan».
Aqtóbe oblysy.