Dzıýdodan Izraıldiń Tel-Avıv qalasynda ótken jyldyń shymyldyq ashar Gran-prı jarysynda qazaqstandyq sportshylar el qorjynyna bir ǵana júlde saldy.
Baıraqty básekeniń alǵashqy kúninde Tel-Avıv tatamıine shyqqan 66 kılodaǵy Erlan Serikjanov týrnırdiń fınalyna deıin jetken bolatyn. О́kinishke qaraı, bas júlde úshin ótken beldesýde Ońtústik Koreıa ókili, álem jáne Azııa oıyndarynyń jeńimpazy, Olımpııa oıyndarynyń kúmis júldegeri An Baýldan «ıpponmen» jeńilip, kúmis medaldi qanaǵat tutty.
Gran-prı jarysyna Qazaqstan quramasynan 20 dzıýdoshy qatysqan bolsa, 19 balýanymyz irikteý básekesinen ári asa almady. Endi otandastarymyz aqpan aıynyń 8-9 kúnderi Parıjde ótetin Grand-slem dodasynda baq synaıdy.