«Qazaqstan – dostyq besigi» atty jazǵy halyqaralyq lagerinde Aqtóbe jáne Reseıdiń Orynbor óńirleriniń jastary bas qosty. Úsh kúndik jıyn kezinde jastar túrli semınarlarǵa qatysyp, psıholog mamandarmen kezdesýler ótkizdi, ózara oıyndar, konkýrstar uıymdastyryldy.
Sharanyń uıymdastyrýshylary bolyp tabylatyn «Jastar qazyna» qoǵamdyq birlestiginiń ókilderi jastarǵa ózara pikir almasyp qana qoımaı, dem alyp, óz ónerlerin ortaǵa salýǵa múmkindik berýdi oılastyrǵan. Aqtóbede mundaı halyqaralyq lager bıyl segizinshi ret uıymdastyrylyp otyrǵan kórinedi.
– Aqtóbelik jastarmen dostyq qarym-qatynas ornatqanymyzǵa biraz ýaqyt boldy. Osyndaı lagerler eki jaqty uıymdastyrylyp keledi, – deıdi Reseı jastar odaǵy Orynbor qalalyq uıymynyń tóraǵasy Rýslan Chýkeev.
«Qazaqstan – dostyq besigi» halyqaralyq lagerinde bas qosqan eki el jastary Aqtóbe qalasynyń ákimi Erhan Omarovpen de kezdesti.
Shahar basshysy jastarǵa ıgi tilekterin jetkize otyryp, bolashaqta mundaı lagerlerge tek Reseı emes, basqa elderden de qonaqtar shaqyrý josparlanyp otyrǵanyn jetkizdi. Ol kezdesýde jastardyń túrli saýaldaryna jaýap berýge de ýaqyt tapty. Shekaralas eki óńir jastarynyń basqosýy dostyqtyń arqaýyn bekitetin shara retinde este qalary sózsiz.
Satybaldy SÁÝIRBAI,
«Egemen Qazaqstan».
Aqtóbe oblysy.