Astanalyq jastar bastaǵan «Biz birgemiz» aksııasyna 13 myńnan astam adam qatysyp, 100-den asa qala shetindegi aýmaqtyń qary tazalandy. Bul týraly Nur-Sultan qalasy ákimdiginiń baspasóz qyzmeti habarlady.
«22 qańtardan bastap Nur-Sultan qalasynda qatty boran men qalyń qar jaýdy. Qazgıdromettiń málimeti boıynsha, 22-27 qańtar aralyǵynda 49.5 mm qar jaýyp, bul qalanyń ortasha qar normasynan 2 ese asty. Qazirgi ýaqytta Nur-Sultan qalasy boıynsha komýnaldyq qyzmetteri 220 246 tekshe qar jınady. Aýysym boıynsha 1 051 birlik tehnıka jumys isteıdi. Nur-Sultan qalasy boıynsha astanalyq eriktiler shtaby «Biz birgemiz» chellendji jobasyn iske qosty. Prezıdent Qasym-Jomart Kemeluly jarııalaǵan Volonterler jylyndaǵy ıgi bastamalardyń biri ekendigin atap ótý kerek» dedi qalalyq Volonterler shtabynyń jetekshisi Shyńǵys Tileýlın.
Sonymen qatar «Biz birgemiz» qozǵalysyna «Qazaqstan stýdentter Alıansy» RQB, «Jas sarbaz» balalar men jasóspirimder áskerı-patrıottyq qozǵalysy, «Qazaqstan jastar kongresi», Astana medısınalyq ýnıversıteti, Sáýlet jáne qala qurylysy basqarmasynyń qyzmetkerleri, Jas Otan JQ qyzmetkerleri qosyldy.