Qazaqstan Prezıdenti QHR Tóraǵasy Sı Szınpınge koronavırýstyń taralýyna baılanysty hat joldady. Bul týraly Prezıdenttiń baspasóz hatshysy Berik Ýálı Facebook paraqshasynda jazdy.
«Qasym-Jomart Toqaev QHR Tóraǵasyna qaýipti vırýsty toqtatý jáne joıý jónindegi Qytaı basshylyǵynyń sheshimderi men is-qımyldaryn joǵary baǵalaı otyryp, Qazaqstan Úkimetiniń Qytaıǵa qajet bolǵan jaǵdaıda jan-jaqty gýmanıtarlyq kómek kórsetýge ázir ekeni týraly sheshimin jetkizdi» dep jazdy Berik Ýálı.
Sondaı-aq Prezıdent koronavırýstyń Qazaqstan aýmaǵynda tarap ketpeýi úshin Úkimettiń qabyldap jatqan is-sharalary týraly habarlady.