Ajalsyz adam

Dańq ordeni... Soǵys jyl­daryndaǵy oǵan ıe bolǵan aǵa urpaq ókilderi... Kezinde biz olar­ǵa qandaı qurmetpen qaradyq deseńizshi! Ásirese atalmysh ma­ra­pattyń I, II, III dárejesine qol jetkizgen áke-aǵalarymyzǵa degen súıis­penshiligimiz erekshe edi. О́ıtkeni mundaı jan­dar ol kezde Keńes Odaǵynyń Baty­ry atty eń joǵarǵy ataqpen qa­tar teńes­tirilip, baǵalanatyn. Biraq bular, ıaǵnı Dańq ordeniniń joǵarydaǵydaı úsh túrin qatar enshilegen qaharmandar elimizde onsha kóp emes-tin. KSRO dep atalatyn 15 odaqtas respýblıkada olardyń sa­ny bar-joǵy 2671 ǵana adam bolatyn. Bú­gin biz, qurmetti oqyrman, solardyń bi­reýi týraly sóz qozǵamaqshymyz. Ol jas­taıymyzdan ózimiz kórip ósken, bir aýylda turǵan, mektep bitirip, qalaǵa oqýǵa ketkenimizshe soǵystyń sanqıly sátteri týraly áńgimelerin áldeneshe ret tyńdaǵan qarapaıym eńbek adamy Beı­qutbaı aǵa Dembaev der edik.

 * * *

Sonymen...

 * * *

...1965 jyl. Maýsym aıy. Mekteptegi oqý jyly aıaqtalyp, kanıkýlǵa shyqqan biz­diń qýa­nyshymyzda shek joq. Biraq bul erkindik uzaqqa sozylmady. Kelesi aptada: «Jumys kú­shi jetispeı jatyr», degen aýyldyq keńes tóraǵasy pár­menimen kolhoz dalasynan bir-aq shyq­tyq. Bizdiń kósheden tizim­ge alynǵan úsh bala: Turbek, Nur­merden jáne men bir jerge túsip­piz. Ol Tanaqora qystaýy irge­sindegi kókónis plantasııasy edi. Min­detimiz – 1,5 gektardaı jerge egilgen qyryq­qabat pen sábizdiń aramshóbin ju­lyp, ár jeti sa­ıyn sýarý. Júıek ara­syn­daǵy topyraqty qopsytyp, oǵan tyńaıt­­­qysh retinde qoradan qı ákep shashý.

Tóńirektegi osyndaı 4-5 top­qa jón-joba kórsetetin brı­gadırimiz Beı­qut­baı aǵa bolyp shyqty. Ol kisini al­ǵash kelgen kúni-aq tanyp, qurmetpen qa­raı bastaǵanbyz. Sebebi, sol jylǵy qys, kóktem aılarynda Jeńistiń 20 jyl­dyǵy atalyp ótiletin bol­dy da Uly Otan soǵysynyń qahar­many retinde Be­keń­niń sýretteri aýdandyq gazette jıi ja­rııalanǵany bar. Ol ýaqytta bas­pasóz betine shyqqan adamnan artyq bedel­di eshkim joq. Keremet baǵalanady. Aıryqsha ardaqtalady. Sondyqtan da 6-7 synyp oqýshylary – bizder bul aǵamyzǵa iltıpatpen qarap, bergen tap­syrmalaryn eki etpeı oryndaýǵa ty­rysamyz. О́z kezeginde ol kisi de solaı. Buta kóleńkesinde otyryp ishetin tús­ki shaı ústinde arqamyzdan qaǵa maq­tap, bizge degen óziniń rııasyz kóńilin jyly júz, meıirimdi kózqarasymen bil­dirgendeı bo­lady. Sondaı kezde batyl­da­nyp, soǵys kezindegi ómiri týraly suraıtynymyz bar. Aǵamyz ondaıda bálsinbeıdi. Bastan kesh­kenin baıyppen baıandap, bitpegen áńgimesin kelesi kúngi úziliste jalǵastyrady. Arada 45 jyl ótse de umytqanymyz joq. Bekeńniń son­daǵy aıtqany tómendegi oqıǵalar edi.

 * * *

...Bizder, balalar bilmeı kelip­piz. 30-jyldary sonaý Al­matydan qııan túpkir, qıyr shet myna Narynqolǵa tuńǵysh traktordy aıdap ákelgen osy Beıqutbaı aǵa eken. Bar-joǵy bas­taýysh synyptyq qana bili­mi bar bozbalany jergilikti moıyn­serik belsendileri: «Oqyǵyn. Adam bo­lasyń», – dep Tal­ǵar­da­ǵy tehnıkýmǵa jibermeı me?! Mine, sonda ondaǵy mehanıka bólimine qabyl­danǵan ol az ýaqyttyń ishinde-aq óziniń eńbekqorlyǵymen kózge túsedi. Sóıtip molotılka, labogreıka jáne «ChTZ» at­ty shaǵyn traktordy shyrq úıiredi. Bu­ǵan rıza bolǵan oblystyq aýyl sha­rýa­shylyǵy basqarmasynyń ýákili ony Eńbekshiqazaq, Uı­ǵyr, sondaı-aq Kegen men Na­rynqol aýdandaryna alǵash ret attandyrǵaly jatqan tehnıka kerýenine qosady. Sonda Tal­ǵar MTS-inen qozǵalǵan 12 traktordyń 1-eýi Baıseıit, 3-eýi Jalańash, 4-eýi Shonjy, 3-eýi Kegen aýyldaryna qaraı burylady da, 1-eýi jas mehanazıtor Beıqutbaı Dembaevtyń júrgizýimen 350 shaqyrymdyq joldyń eń sońǵy núktesi Na­ryn­qolǵa aman-esen jetedi. Árıne tehnıkanyń túr-túri kóbeı­gen keıingi zamanda bul sonshalyqty qyzyqty oqıǵa bolyp kórinbeýi múmkin. Al, biraq sol 30-jyldardaǵy jurt úshin tasbaqa dep atalyp ketken qos temir dońǵalaqty «ChTZ» traktoryn kórý, júrgizý jer-kókte joq jetistik edi.

Sóıtken jas jigit joǵary­daǵy «jo­ryq­tan» soń kóp uzamaı áskerge shaqy­rylady. Bul 1939 jyl bolatyn. Áp de­gende Brest ma­ńyna baryp túsken qazaq­standyq ulandar ondaǵy artıllerııa bólimderinde qyzmet etedi. Sodan keıin Mannergeım bekinisi mańaıyndaǵy aq fınder shekarasynda turady. Mine, osy kezde 1941 jylǵy alapat soǵys bastalǵan edi.

– Jaýmen aradaǵy shaıqasty men zeń­birekke oq tasýshy bolyp bastadym, – degeni esimizde aǵamyzdyń kezek­ti bir áńgime ústinde. – Ýaqyt óte ke­le­ atal­mysh qarýdyń kózdeýshisine aı­nal­­dym. Bir jyldan soń bizdiń 43-tank joı­ǵysh dıvızıonymyzdy 8-gvar­dııa­­lyq armııanyń quramynan bólip al­dy da Sta­lıngradtaǵy qan qasap soǵys­qa ákelip saldy. Osy jerde men alǵash ret ajalmen betpe-bet kez­­des­tim, qaraqtarym. Biraq, Qu­daıdyń qudi­retimen odan aman qaldym. «Qalaı?» – deısińder ǵoı. Aıtaıyn.

Keıipkerimizdiń sózine qara­ǵanda biz­diń áskerlerdiń shaǵyn toby qala­nyń jumysshylar kenti jaǵynda urys júrgizip ja­tady. Sonda bir bronetrans­porterdi aldaryna salǵan ne­mis­ter bu­­lardy tyqsyryp, qor­­shaýǵa alýǵa yń­ǵaılanady. Olar panalap kele jatqan anaý temir tajaldy toqtatpaıynsha jaǵ­daıdyń ózgermeıtinin bilgen nysana kózdeýshi Beıqutbaı Dembaev ony zeńbirekpen eki ret­ atyp, ot-jalynǵa oraıdy.­ Osy qımyldan jaý jaǵy sál osharyla turyp qalǵanda, bul qasyndaǵy kómekshilerine zeńbi­rekti keıingi shepke alyp ketýdi buıyrady da ózi snarıadtan qula­ǵan kúzetshi kúrkesiniń ishine kirip, fashısterdi bettetpeýdiń qa­myna kirisedi. Sol sátte... ıá, sol mezette bir­deńe jer-kókti kóshire gúrs ete túsedi de aınalany tastúnek qarańǵylyq ja­ýyp, tarsyl-gúrsilge toly tóńirek tyl­sym tynyshtyqqa oranady. «Bul ne?» deıdi japyrylǵan býdkanyń ishinde denesi qysylyp, esi kiresili-shyǵasyly bolyp jatqan Bekeń. Sóıtse munyń ústine irgedegi barak úıdiń tereze jaq qabyrǵasy opyryla qulaǵan eken. Sodan: «Tóńirekte bireý bar ma? Qutqaryńdar!» – dep al kep aıǵaılasyn. Biraq kirpish basqan úıindi arasynan shyqqan úndi kim tyńdasyn. Qumyqqan ol daýys kimniń qulaǵyna jetsin. Osy­laı kún batqan. Tún kelip, tań at­qan. Al Bekeń bolsa aı­ǵaı­laýdan daý­sy bitip, endi av­tomatynyń dúmimen kúr­keniń qańyltyr esigin tyq-tyq etkizip ur­ǵylaýǵa kóshedi. Sodan qansha ýaqyt ót­kenin bilmeıdi. Ábden álsiregen ol esi aýyp baryp kózin ashsa, tóbede as­pan kórinedi. Tóńiregi tolǵan topyraq pen beı-bereket shashylǵan kirpish synyq­tary. Al janynda basyn súıep, buǵan úńi­le qaraǵan orys ájeı otyr. Keıin bildi, bul Shýra Nılovna degen osy kent­tiń turǵyny eken. Atys toq­taǵanda ol kisi shaıqas aldynda syrtta júrip, jer­­tólege qaıta oralmaǵan shalyn izdep shyq­paı ma? Mine, sonda ájeı qulaǵan qabyrǵa arasynan tyq-tyq etken dybysty estıdi. Úıilgen kirpishterdi jan­ushyra qoparyp qarasa...Adam... Iá, qańyltyry qabysqan úıshik ishinde búk­túsken jaýynger jatyr. Qyzyl ásker!

– «Qyryq jyl qyrǵyn bolsa da ajaldy óledi» – dedi osy araǵa kelgende áńgime ıesi. – Muny aıtyp otyrǵanym, soǵysta adamdar tek oqqa ushyp, snarıad jaryqshaǵy tıip qaza tappaıdy eken. Sýǵa ketip, órt ishinde qalyp, topyraqqa da kómilip óletin bolyp shyq­ty. Onyń dáleli meniń óz basymnan ótken joǵarydaǵy jaǵdaı. Eger sonda ımandy bolǵyr orys ájeı kezdes­pegende... Iá, kirpish astyndaǵy bolar-bolmas dybysty sol Shýra Nılovna estimegende... Onda meniń, sodan bylaı jer basyp júrýim, Jeńis kúnin kórip, elge aman-esen jetýim tipti de múmkin emes edi.

– Al Dańq ordeni she, aǵa! Onyń bireýin ǵana emes, úsheýin de alýyńyz qalaı bolyp edi? – deımiz áńgimege elitken biz Bekeńdi qaýmalaı túsip.

– 1944 jyly, – dep bastady bul taqy­ryptaǵy áńgimesin ol kisi, – bizdiń 39-gvardııalyq atqyshtar dıvızııasynyń jaýyn­gerleri Polsha shekarasynan ótip, Skýrcha-Vılchkovıse voevodosy mańyndaǵy Vısla ózenine jetip toqtady. Jaz aıy edi. Aı­dyndy sý jaǵalaýy syń­syǵan orman. Nemister arǵy bette. Biz ber jaqtamyz. О́teıik desek, jań­byrsha jaýǵan oq mańaı­latpaıdy. Ásirese solardyń ishinde temir beton jıe­gin­degi tóbeshikten yńǵaıly oryn tapqan artıl­lerııalyq qondyrǵynyń qımyly eren. Qylt etkendi qa­ǵyp tastap tur. Sonyń saldarynan bir táýlikke jeter-jetpes ýaqyt ishinde bizdiń jaqtaǵy 76 mıllımetrlik 4 zeńbirek isten shyǵyp, adamdary túgel opat boldy. Bir ýaqytta:

– Serjant Dembaev, – degen daýys estildi blındaj jaqtan. – Qarsy bettegi dzotqa japsarlas jaý raschetin joıýdy saǵan tapsyramyn!

– Qup bolady, joldas komandır!

...Qolymda dúrbi. Ańysyn ańdyp jatyrmyn. Ajal aýzy bizge qarap tur. Kóz jazbaıdy pátshaǵar! Kenet ózendi boılaı júzgen bir qaıyq kórindi. Ús­tinde eki adamy bar. Jaýdiki me, biz­d­i­ki me, álde jergilikti turǵyndar ma, bil­meımin. Meniń kózim qar­sylastardyń artıl­lerııalyq qon­dyrǵysynda. Mine, onyń oq­pany birte-birte sý ústindegi qaıyqqa qaraı buryldy. Iá, sát! Kómekshim ekeý­miz zeńbiregimizdi janymyzdaǵy eńiske qaraı ıterip jiberdik. Ol syrǵyp baryp qa­lyń butanyń ishine toqtady. Jaý ras­cheti muny baıqaǵan joq. Qýanyp kettim. Burshaqtaǵan mańdaı terimdi súrtip tas­tap, baýyrymmen jyljyǵan kúıi zeń­biregime jettim-aý. Júrek atsha týlaıdy. Qarsy bettegiler kórse ólemin. «Qosh bol, týǵan jer, qosh bol, maıdandas dostarym...», «Jo-joq, tapsyrmany oryndamaı jan qııýǵa bolmaıdy. Jaýdy qalaıda qurtý kerek!». Osy oımen boıymdy tez jıyp, buta arasynan qarsy jaqqa dúrbi salyp qaramaımyn ba?! Sóıtsem, jaý áli de qaıyq qımylyn qalt jibermeı ańdýda eken. Dereý nysanaǵa aldym. Snarıad artynan snarıad jiberip, es jıǵyzbaýǵa kóshtim deısiń!.. Sodan ile-shala oryn aýystyryp, jaý rascheti jaqqa qarasam, tóńiregi astań-kesteń bolǵan onyń kúli kókke ushypty. Osyny kútip otyrǵan bizdiń áskerler: «Ýra, ýra!» – dep qalqymaly kópirge kerek re­zeńke pontondardy kótere ózenge janushyra bettep bara jatty. Sonymen, sózdiń qysqasyna kelsek, qaraqtarym, III dárejeli Dańq ordenin men mine, sonda alǵan edim.

Bekeń osylaı dep únsiz qaldy. Sóıt­ti de áńgimesin qaı­tadan jalǵas­tyr­dy. Odan uq­qanymyz, ol kisi tara­pynan ja­salǵan kelesi bir batyl qa­dam sol jyldyń kúzinde bolǵan eken. Keıipkerimiz qyzmet etetin I Be­larýs maıdanynyń jaýyngerleri jo­ǵaryda sóz etken Polsha jerine den­deı enip, onyń Radomskoe voevodasyna ıek art­qanda, nemisterdiń qatty qar­sylyǵyna ushyraıdy. Jaý bulardy aldymen artıllerııa arqyly atqylaıdy. Sodan soń kókke kóterilgen «Iýnkers» pen «Fok­ke fýlf» tóbelerinen oq sebelep bas kótertpeıdi. Osydan soń baryp Ýtınkı eldi mekeni jaqtan óz ásker­lerin qol­daǵan nemis tankileriniń qarasy kórinedi. Solardyń ishin­de ózge­lerinen ozyńqyrap kele jatqan temir tajaldy Bekeń asyqpaı baqylap onyń qımyl-qozǵalysyn qalt jibermeı qa­da­ǵalaýmen bolady. Aqyry zeń­birek oǵy jeter jerge kelgende júrgizýshi otyratyn tereze ma­ńaıyn nysanaǵa ala atpaı ma?! Biraq brony myqty eken, bylq etpeıdi. «Katokty... Iá, katokty kózdeý kerek», – deıdi bul kisi osydan keıin ózine ózi kúbirleı sóılep. Sóı­tedi de zeńbiregindegi optıkalyq pýlt pa­rametrlerin tanktiń temir dóń­­gelekteri tusyna túıistire bere oqpan­daǵy oqty jiberip kep qalady. Oıy – júris qozǵalysyn qamtamasyz etip kele jatqan shynjyrdy úzý. «Sonda ne boldy?» – deısizder ǵoı. Susty júzi, qor­qynyshty únimen jer-kókti kóshirip kele jatqan temir tajal tóbege urǵandaı solq etip toqtaıdy da bir ornynda shyr aınala bastaıdy. Biraq, ekıpajy aman. Onyń kózin qurtpasa jaý kózdeýshisi lıýk kabınasyndaǵy oqpandy buryp, bulardy oq astyna almaq. Osyny sezip úlgergen Bekeń shyr aınalǵan tanktiń búıir tusy ózderine kóldeneńdeı bergende: «Iá, sát!» – deıdi. Sóıtedi de onyń artyndaǵy janarmaı bóktergen bóshkeni nysanaǵa alǵan boıda jedeldete eki ret atyp jiberedi. Sol mezette baktan qaraqoshqyl tútin kóterilip, artyn­sha tars etip jarylǵan tanktiń kúli kókke ushady.

Osy erligi úshin «Dańq» or­deniniń II dárejesine ıe bolǵan Beıqutbaı aǵa arada jylǵa jýyq ýaqyt ótkende atalmysh­ marapattyń eń joǵarǵy I basqy­shyna da qol jetkizedi. Bul 1945 jylǵy sáýir aıynyń sońǵy kún­derindegi Berlın úshin bolǵan shaıqastaǵy janqııarlyq erlik edi. «Basqasha teńeýmen aıtýǵa kelmeıtin bul batyl árekettiń basy Ratýsha ma­ńaıyn­daǵy shabýylda bastaý alypty. Kóshe óte tar eken. Ár 50-100 metr qa­shyq­tyq aralyǵyndaǵy kóldeneńinen qoıylǵan kedergilerge bekingen nemister eshkimdi bettetpeıdi. Tankini aldyǵa sa­lyp jyljýǵa múmkindik joq. Ol tro­týar sekil­di etip salynǵan jińishke jol­­ǵa syımaıdy. Amaly taýsyl­ǵan ba­talon komandıri serjant Beıqutbaı Dem­baevtyń raschetin shabýyldaýshy rota aldyna shyǵarady. Buıryq bo­ıyn­sha zeńbirek barrıkadaǵa uqsas kedergilerden pýlemet uıalaryn snarıadpen joıyp otyrýy tıis. Al jaıaý áskerler sol mezette atakaǵa kóterilip, bekinisti basyp alýǵa úlgerýi qajet. Osy ádispen bular ózderine qalqa bolady-aý degen ár múıisti panalaı oty­ryp, nemis­terdiń 8 pýlemet uıasyn joıady. Eń sońynda kósheni tuıyqtap turǵan órt sóndirý mekemesi úıine jaqyndaǵanda, onyń óte berik bekiniske aınal­ǵanyn baıqaıdy. Aınalasy tola temir tiken­di «kirpiler» men qum­qapshyqtan turǵy­zyl­ǵan keder­giler. Al ǵımarattyń esik, tere­zeleri bolsa, olardan oq damylsyz borap tur.

– Qıratý qajet! – deıdi zeńbiregin kóshedegi barrıkada tasasyna ornalastyryp jatqan Bekeńe rota komandıri. – Iá, qurtý kerek myna úıdi. Áıtpese bul jerden alǵa jyljýymyz qıyn. О́te qıyn!..

Sodan ne kerek, jaıaý áskerler al­dyn­daǵy jalǵyz raschet qarsy bettegi bir qabat kirpish úı shetin ala bere qos snarıadty jedeldete jiberip qalsyn. Jaý jaǵy ý-shý. Osyny paıdalanyp oryn aýys­tyrǵan Bekeńniń toby endi órt sóndirý mekemesiniń ekinshi jaǵyn atqylaýǵa kóshsin. Ol tus shań-tozańǵa oranyp jatqanda, raschettegi úsh jigit zeńbirekti qaıta súıretip ákelip, ǵı­marat­tyń ortańǵy tusyna oıran salsyn. Qoldarynda avtomat pen pýlemet jáne ara-tura tyq-tyq etkizip atatyn mınometten bas­qa qýatty qarýy joq, tek bekinisteriniń myqtylyǵyna sengen nemister endi ne isterlerin bil­meı alasursyn. Osy kezde bastapqydaǵy ǵalamat oq nóse­rinen bas kótere almaı, jerge jabysa jatyp qalǵan bizdiń jaıaý áskerler jaǵdaıdyń ózgergenin bilip: «Alǵa!» – dep atakaǵa umtylsyn!...

 * * *

Sol jazda biz mektep oqý­shy­lary Bekeńdi óte jaq­sy kórip kettik. Oǵan sebep bol­ǵan ol kisiniń soǵys týraly joǵa­rydaǵydaı ǵajap áńgimeleri ǵana emes, keremet kishipeıildiligi de edi. Qarapaıym, momyn adam-tyn. Jas aıyrmashylyǵy bizden óte úlken bola tura bala minez aqkóńildiligin aıtsańyzshy! Qa­teligimizge qabaq shytpaıtyn. Ne bitip, ne qoımaıtyn sansyz suraq­tarymyzǵa da renjimeıtin. Bárine tózimdilik tanytatyn asyl adam edi j­a­ryq­tyq.

Kelesi jylǵy jazǵy kanıkýlda basqa brıgadada jumys istedik. Odan arada eki jyl ót­ken soń, orta mektepti bitirip, Al­matyǵa oqýǵa attandyq. So­dan qys tússe sessııa, jaz shyq­sa stýdenttik qurylys otrıady... Onyń sońy mamandyq alyp, jumysqa ornalasýǵa ulasty da aýylǵa kóp barmaıtyn, Be­keń sııaqty aqsaqaldardy jıi kórmeıtin boldyq.

Biraq... ıá, biraq, ol kisi­men sońǵy ret júzdeskenim esim­de. Áli umytqanym joq. 1985 jyl edi. Almaty irgesin­degi Qap­sha­ǵaıda mektep oqýshy­lary­nyń respýblıkalyq «Orlenok» jáne «Zarnısa» oıyndary ótti. Jeńistiń 40 jyldyǵy qurmetine arnalǵan bul sharada soǵys ardagerlerimen birge Qazaqstan LKSM Ortalyq Komıtetine qa­ras­ty 4-5 basylymnyń tilshi­leri bizder de boldyq. Sonda keýdesine I, II, III dárejeli Dańq ordenderi jarqyraǵan Beıqutbaı aǵa Dembaevty kórip qalmasym bar ma?! Burylyp baryp sálem berdim. Aqsaqal alǵashynda: «Bul kim?» – degendeı betime ań­­taryla qarady. Qarııany yń­ǵaı­syzdandyrmaıyn dep: «Siz bizdiń aýyldansyz», – dedim jazý­shy Baqqoja Muqaev aǵam sııaqty ázildep. Sol kezde baryp shyramytty-aý deımin. «Joq, bala! Sen bizdiń aýyldikisiń», – dedi ol kisi jymıyp. Sóıtti de: «Usta Álekeń – Álıhan qarttyń ulysyń ǵoı. Bárekeldi! О́sip, er­jetipsiń. Rızamyn, aınalaıyn! Tanyp, sálem bergenińe rahmet!» – dedi shyn kóńilden.

...Sońǵy kezderi elordadan aýylym Narynqolǵa barǵan saıyn ony kóp aralaıtyn boldym. Irgedegi ózen jaǵasynan sonaý 60-jyldardaǵy baqytty balalyq shaǵym qol bulǵaıdy. Jol jıegindegi alyp aǵashtardyń árqaısysy ómirden bir-bir báı­terek bolyp ótken qarttardy esime túsiredi. Mundaǵy kósheler she?! Iá, kósheler... Olardyń da óz aıtar syry, sherter she­jiresi bar. Máselen burynǵy Krasno­armeıskaıa oramynan ót­ke­nimde, ondaǵy 68-úıde turyp, ómir súrip, baqılyqqa attanǵan Beıqutbaı aǵa beınesi aldyma kelip tura qalǵandaı bolady. Sodan joǵary kóterilip, kelesi kóshedegi ózimniń týyp-ós­ken úıime, ákemniń qaldyrǵan qarashańyraǵy 42-úıge jaqyn­daımyn. Mine, osy kezde kóńilim kóterilip sala beredi. Sebebi buryn Mır delinetin bul kóshe qazir Dańq ordeniniń tolyq ıe­geri Beıqutbaı aǵa Dembaev atyn ıelengen. Osyny kórgende: «Táýbe! Batyrdyń aty ataýsyz qalmaǵanyna shúkir», – deımin ish­teı kúbirlep.

Janbolat AÝPBAEV,

jýrnalıst

Almaty oblysy,

Raıymbek aýdany,

Narynqol aýyly