«Ǵylym ordasy» Sırek kezdesetin kitaptar mýzeıi ǵulama-ǵalym, álemge áıgili oıshyl, fılosof, kóptegen ǵylym salasyna zertteýlerin arnaǵan Ábý Nasyr ál-Farabıdiń 1150 jyldyǵyna oraı uıymdastyrylǵan «Islam kallıgrafııasynyń fılosofııasy» taqyrybynda kallıgraf Asylbek Orynbasarovtyń týyndylarynan turatyn kóshpeli kórmeniń tusaýkeseri men sheberlik-dárisi ótti.
Ekspozısııalyq kórmede arabtyń kórkem súlis, nash, farsı, dıýanı jazý stılderimen Quran súreleri, lıgatýralar, kórkem sózder men maqaldar berildi.
Kórme týyndylarynyń avtory Asylbek Baıuzaquly zamanymyzdyń tanymal mysyrlyq jáne túrik kallıgrafııa ustalary Hasan Chelıabı, Ferhat Kýrlý, Mýmtaz Dýrdý, Ahmad Fares, Abdýlla Osmannyń shákirti. Nursultan, Almaty, Máskeý, Stambýl qalalarynda personaldy kallıgrafııa kórmesin ótkizgen. Sheberlik-dáriske RMK «Ǵylym ordasy» qyzmetkerleri, kallıgrafııa ónerine qyzyǵýshylyq tanytqan qala turǵyndary men qonaqtary qatysty. Asylbek Baıuzaquly kórmeden oryn alǵan týyndylardyń jasalý tehnıkasyn, qysqasha mazmunyn, túsiniktemesin aıtyp, tanystyryp ótti.
Sheberlik-dáris barysynda kallıgrafııa salasynyń tarıhynan syr shertip, arab kallıgrafııasynda qoldanylyp kele jatqan jazý stılderimen, orta ǵasyrda qoldanylǵan sııanyń jasalý tehnıkasymen, bambýk qalamdarmen kallıgrafııalyq týyndylardy jazýdy úıretti. Sheberlik-dáris sońynda qatysýshylarǵa sertıfıkattar tabystaldy. «Islam kallıgrafııasynyń fılosofııasy» kóshpeli kórmesin 20 aqpanǵa deıin Sırek kezdesetin kitaptar mýzeıinde tamashalaýǵa bolady.
ALMATY