Majarstannyń Debresen qalasynda ótip jatqan bokstan Ishtvan Bochkaıdy eske túsirýge arnalǵan halyqaralyq týrnıriniń shırek fınal jekpe-jekteri aıaqtaldy. Qazaqstan quramasy sapynan 6 boksshy jartylaı fınalda judyryqtasady.
Atap aıtar bolsaq, shırek fınaldaǵy básekede 52 kıloda synǵa túsken Mahmud Sabyrhan ıspanııalyq Martın Molınadan basym tústi. 2016 jyly jastar arasyndaǵy Azııa birinshiliginiń qola júldegeri Aıdos Arapov (57 kg) shırek fınalda Italııa ókili Djanlýka Rýssony, 69 kılodaǵy Talǵat Shaıken taǵy bir ıtalııalyq sportshy Djanlýka Malanıdi esh qıyndyqsyz jeńdi. Sondaı-aq aǵaıyndy Oralbaılar da týrnırdiń jartylaı fınalynda judyryqtasady. 81 kılodaǵy Nurbek reseılik Rasýl Alıevten, 91 kılodaǵy Aıbek ıspanııalyq Emanýeel Reıesten aılasyn asyrdy. Asa aýyr salmaqtaǵy Damır Toıbaı aýstrııalyq boksshyny jeńip, jartylaı fınalǵa joldama aldy.