Jambyl oblysynyń Qordaı aýdanynda bolǵan qaqtyǵysqa baılanysty Memleket basshysy Qasym-Jomart Toqaev oqıǵa saldaryn joıý maqsatynda Úkimet komıssııasyn qurýdy tapsyrǵan bolatyn. Prezıdenttiń tapsyrmasy boıynsha búgin Qazaqstan Respýblıkasy Premer-Mınıstriniń orynbasary Berdibek Saparbaev bastaǵan Úkimet komıssııasy Jambyl oblysyna arnaıy keldi.
Berdibek Saparbaev Qordaı aýdanynyń ortalyǵy Qordaı aýylyndaǵy aýrýhanaǵa baryp, toptyq tóbeles kezinde zardap shekken turǵyndarmen sóılesti. Komıssııa tóraǵasyna medısınalyq mekemelerge 12 adamnyń jatqyzylǵany, 20 adamnyń baqylaýda jáne emhanadan shyǵarýǵa ázirlenýde ekeni baıandaldy. Sonymen qatar 5 pasıent sanıtarııalyq avıasııa jelisi boıynsha Almaty qalasyna, 1 pasıent Taraz qalasyna aýystyrylǵan. Barlyǵyna qajetti medısınalyq kómek tolyq kólemde kórsetilýde. Jalpy, medısınalyq kómekke barlyǵy 127 adam júgingen, onyń ishinde 84 adam tekserýden soń úılerine qaıtarylǵan.
Qordaı aýdanynda bolǵan Berdibek Saparbaev jergilikti aqsaqaldarmen de kezdesip, bolǵan qaqtyǵystyń negizgi sebepteri týraly surady. Bul rette Sortóbe aýylynyń turǵyny Arlı Mýsarov munyń turmystyq kıkiljiń ekenin, qazir jaǵdaıdyń turaqty ekenin aıta kelip, barlyǵy da zań boıynsha, quqyqtyq sala aıasynda bolsa eken degen tilegin jetkizdi. Berdibek Máshbekuly aýdandaǵy turaqtylyqty qamtamasyz etý úshin Prezıdent tapsyrmasy boıynsha Úkimet komıssııasy Jambyl oblysyna arnaıy kelgenin atap ótti.
«Biz sizderden, qoǵamda bedeli bar aqsaqaldardan turǵyndarǵa bizdiń jaǵdaıdy obektıvti turǵyda anyqtaý úshin kelgenimizdi túsindirýlerińizdi ótinemiz. Kináliler jazasyn tartady. Barlyq zardap shekkenderge qajetti medısınalyq jáne basqa da kómek kórsetilip jatyr. Qazir basty másele – óńirdegi turaqtylyqty, quqyqtyq tártip pen qaýipsizdikti qamtamasyz etý» dedi Berdibek Saparbaev.
Jambyl óńirine arnaıy kelgen Úkimet komıssııasy Qordaı, Masanshy, Aýqatty, Sortóbe eldi mekenderindegi qazirgi jaǵdaımen tanysty. Sonymen qatar jergilikti turǵyndarmen kezdesip, turǵyn úılerdi, áleýmettik jáne kommersııalyq nysandardy aralady. Oqıǵa kezinde qaıtys bolǵandardyń otbasylarymen kezdesti. Sonymen qatar Úkimet komıssııasy jergilikti jerde áleýmettik-ekonomıkalyq jáne gýmanıtarlyq sıpattaǵy máselelerdi sheshý boıynsha shuǵyl sharalar qabyldady. Komıssııa Prezıdent tapsyrmasy negizinde Jambyl oblysynyń ákimdigimen birlesip, qaza tapqandardy jerleýdi uıymdastyrý, keltirilgen zalaldy baǵalaý jáne zardap shekken menshik nysandaryn qalpyna keltirý boıynsha jumys atqaratyn bolady.
Jambyl oblysy